તિજોરીને નડતા ત્રણ ગ્રહ: AMTS, BRTS, SVP પાછળ દર વર્ષે રૂ. ૮૪૦ કરોડનો ખર્ચ

દર મહિને AMTSને દોડાવવા રૂ. ૩૦ કરોડ, BRTS માટે રૂ. ૨૦ કરોડ અને SVP હોસ્પિટલ ચલાવવા રૂ. ૨૦ કરોડ તંત્ર ચૂકવે છે

અમદાવાદ, શુક્રવાર

મ્યુનિસિપલ કોર્પોરેશન દ્વારા શહેરીજનો માટે અનેક પ્રકારની સેવાનાં કામ ચલાવાઈ રહ્યાં છે. નહીં નફો-નહીં ખોટના ધોરણે જ નહીં, પરંતુ અમુક સંસ્થાઓને તો તંત્રે ખોટ ખાઈને પણ ચાલુ રાખવી પડે છે. આવી સંસ્થાઓને મ્યુનિ. સૂત્રો મજાકના સૂરમાં એએમસીના 'જમાઈ રાજા' તરીકે ઓળખાવે છે. જાહેર પરિવહન સેવાની બંને સંસ્થા એટલે કે એએમટીએસ અને બીઆરટીએસ તેમજ ગરીબ જનતાની સ્વાસ્થ્ય શુશ્રૂષા માટે ઊભી કરાયેલી એસવીપી હોસ્પિટલને ચાલતી રાખવામાં મ્યુનિ. સત્તાવાળાઓને બારે મહિના પરસેવો પડી રહ્યો છે, કેમ કે આ ત્રણેય સંસ્થાના સંચાલન પાછળ દર વર્ષે રૂ. ૮૪૦ કરોડનો જંગી ખર્ચ મ્યુનિ. તિજોરીમાંથી કરવો પડે છે. જો આટલી જંગી રકમ મ્યુનિ. સત્તાધીશો સમયસર ન ચૂકવે તો એએમટીએસ-બીઆરટીએસ અને એસવીપી હોસ્પિટલને રાતોરાત તાળાં મારી દેવાં પડે તેમ છે.