બિહારમાં રાજકીય ભૂકંપ: શાસક ગઠબંધન ભંગાણના આરે, નવી સરકાર રચવાની હિલચાલ

જેડીયુ અને કોંગ્રેસના તમામ ધારાસભ્યોને પટણા પહોંચવા ફરમાન: આરજેડી પણ સક્રિય

પટણા, સોમવાર

બિહારના રાજકારણમાં ફરી એક વખત ભૂકંપ આવ્યો છે. બિહારની રાજનીતિમાં આગામી ૪૮ કલાકમાં મોટા પાયે ઊથલપાથલ થવાનાં એંધાણ વર્તાઈ રહ્યાં છે. છેલ્લા કેટલાક દિવસોથી જે રીતે બિહારના મુખ્યપ્રધાન નીતીશકુમાર અને ભાજપ વચ્ચે શીતયુદ્ધ અને ટકરાવની સ્થિતિ સર્જાઈ છે તે જોતાં હવે એવા સ્પષ્ટ સંકેતો મળી રહ્યા છે કે રાજ્યમાં જેડીયુ અને ભાજપનું શાસક ગઠબંધન ભંગાણના આરે છે.

બિહારની રાજનીતિના નિષ્ણાતોનું કહેવું છે કે ૧૧ ઓગસ્ટ પહેલાં બિહારમાં એનડીએ સરકારનું પતન થશે અને નીતીશકુમાર ફરી એક વખત રાષ્ટ્રીય જનતાદળ (આરજેડી) અને કોંગ્રેસ સાથે હાથ મિલાવીને નવી સરકાર રચશે. આ સંદર્ભમાં નીતીશકુમારે આવતી કાલે જેડીયુના તમામ ધારાસભ્યો અને સાંસદોની પટણા ખાતે એક મહત્ત્વની બેઠક બોલાવી છે.