એરપોર્ટ રોડ પરથી રખડતાં ઢોર દૂર કરો': મ્યુનિ. કમિશનરનો કડક આદેશ

તંત્ર દ્વારા રોજનાં ૧૦૪ ઢોર પકડવામાં આવે છે

અમદાવાદ, શનિવાર

શહેરમાં રખડતાં ઢોરનો ત્રાસ બેફામ રીતે વધ્યો છે. મોટા ભાગના વિસ્તારના રસ્તા કે સર્કલ પર રખડતાં ઢોર બેઠેલાં જોવા મળે છે. આના કારણે છાશવારે અકસ્માતો થતાં હોઈ કેટલાક વિસ્તારમાં નિર્દોષ લોકોને જીવ ગુમાવવાનો વારો આવ્યો છે. અમદાવાદ ઉપરાંત રાજ્યના અનેક વિસ્તારોમાં રખડતાં ઢોરનો ત્રાસ હોઈ હાઈકોર્ટ પણ આકરાં પાણીએ છે. હાઈકોર્ટ દ્વારા રખડતાં ઢોરને પકડીને ઢોરવાડામાં પૂરી દેવાના ઓગસ્ટના છેલ્લાં અઠવાડિયામાં મ્યુનિ. તંત્રને આદેશ આપતાં કમિશનર લોચન સહેરાએ આ માટે ખાસ એક્શન પ્લાન બનાવ્યો છે. કમિશનરના એક્શન પ્લાન મુજબ મ્યુનિ. ઢોર ત્રાસ અંકુશ નિવારણ વિભાગ દ્વારા અમદાવાદમાંથી રખડતાં ઢોર ઝબ્બે કરવાની કામગીરી કરવામાંઆવે છે. જોકે આ કામગીરીથી કમિશનર સહેરાને ખાસ સંતોષ થતો હોય તેમ લાગતું નથી, કેમ કે એરપોર્ટ રોડ પરથી રખડતાં ઢોરને દૂર કરવાનો વિશેષ આદેશ તંત્રને આપવાની તેમને ફરજ પડી છે.