પોલીસ સ્ટેશનની નજીક આવેલાં પાન પાર્લર અને કીટલી પર પણ ACBની 'વોચ'

ઈન્દિરાબ્રિજ સર્કલ પાસે આવેલા એક પાન પાર્લરમાં પોલીસના ઉચ્ચ અધિકારીઓના સૌથી વધુ વહીવટ થતા હોવાનો ખુલાસો: ગુનેગારો સાથે પાન પાર્લર-કીટલી પર લાંચનો ‘વહીવટ’ થતો હોવાથી બ્યૂરો એલર્ટ

અમદાવાદ, શનિવાર

રાજ્યનાં અલગ અલગ શહેરોમાં એન્ટી કરપ્શન બ્યૂરો (એસીબી)ની ધોંસ વધતાં હવે સરકારી બાબુઓ લાંચ લેતાં પહેલાં દસ વખત વિચાર કરી રહ્યા છે. ત્યારે હવે લાંચના રૂપિયા આસાનીથી આવી જાય તે માટે સરકારી બાબુઓ અલગ અલગ ટ્રિકનો ઉપયોગ કરી રહ્યા છે. લાંચ પેટે ગિફ્ટકાર્ડ, મોંઘી મોંધી ગિફ્ટો, ટૂર પેકેજ લેવાં તે સરકારી બાબુઓની પહેલી પસંદ છે પરંતુ રોક્ડ લેવા માટે અનોખી વ્યવસ્થા કરી દીધી છે. સરકારી કચેરી કે પોલીસ સ્ટેશનની બહાર આવેલા પાનના ગલ્લા તેમજ ચાની કીટલીઓ પર લાંચની રકમ સ્વીકારવામાં આવી રહી છે. પાનના ગલ્લા અને ચાની કીટલીના માલિકો લાંચની રકમ સ્વીકારે છે અને બાદમાં રાતે પોલીસ કર્મચારીઓ પાસે પહોંચે છે. ઇમાનદાર પોલીસ અધિકારીઓ તેમજ એન્ટી કરપ્શન બ્યૂરોના કેટલાક અધિકારીઓ પાનના ગલ્લા અને ચાની લારીઓ પ૨ ગુપ્ત વોચ રાખીને બેઠા છે.