સલાહ આપી તો મોત મળ્યું: યુવકે વૃદ્ધને જાહેરમાં છરીના ઘા ઝીંકી રહેંસી નાખ્યા

રામોલનો બનાવઃ વૃદ્ધે પરિચિત યુવકને ખોટું કામ નહીં કરવાની સલાહ આપી હતી, આરોપી યુવક હજુ બે દિવસ પહેલા જ જેલમાંથી છૂટીને બહાર આવ્યો હતો

અમદાવાદ, બુધવાર

સારી સલાહ આપવાની ટેવ પણ ઘણી વખત મોટી મુસીબતને આમંત્રણ આપતી હોય છે તે વાત પુરવાર કરતો એક ચોંકાવનારો કિસ્સો રામોલના જનતાનગ૨માં બન્યો છે. જેલમાં છૂટીને આવેલા યુવકને સમજાવનાર વૃદ્ધની ગઇ કાલે કરપીણ હત્યા થઇ ગઇ છે. વૃદ્ધે યુવકને ખોટું કામ નહીં કરવા મામલે સમજાવ્યો હતો. જેની અદાવત રાખીને ગઇ કાલે જાહેરમાં છરીના ઘા ઝીંકી દીધા હતા. વૃદ્ધ પર હુમલો કર્યા બાદ આરોપી યુવક નાસી છૂટ્યો હતો પરંતુ તેણે મૃતકના એક મિત્રને ફોન કરીને મરનાર વ્યક્તિના ખબરઅંતર પણ પૂછ્યાં હતાં.