વહીવટદારોએ બુટલેગર્સ પાસેથી ભરણ લેવાનો ઈનકાર કરી ધંધા બંધ કરાવ્યા

પીઆઈ પોતાની નોકરી બચાવવા માટે દારૂના ધંધા ચાલવા નહીં દેઃ પોલીસની કામગીરીથી બુટલેગર્સને રોવાના દિવસ આવી ગયા

અમદાવાદ પોલીસ પર જાણે કે પનોતી બેઠી હોય તેમ લોકો માની રહ્યા છે. નરોડા-દહેગામ હાઇવે પર દારૂના નશામાં ગોપાલ પટેલે કરેલા અકસ્માત બાદ પોલીસ વધુ એક્ટિવ થઈ છે અને ઠેરઠેર દારૂના અડ્ડા બંધ કરાવી દીધા છે. આ સિવાય વહીવટદારોએ પણ બુટલેગર્સ પાસેથી ભરણ લેવાનો ઇનકાર કરી દીધો છે. પોલીસ હવે દારૂ-જુગારના અડ્ડા પર સતત ત્રાટકીને અને એજન્સીઓ પણ રેડ કરીને કાર્યવાહી કરશે.

નહેરુનગરમાં વેપારીની હત્યા અને કાગડાપીઠમાં યુવકની હત્યા બાદ પોલીસની કામગીરી પર અનેક સવાલ ઊભા થયા હતા. વધી રહેલી ગુનાખોરીના કારણે લોકોમાં ડરનો માહોલ જોવા મળ્યો હતો. અમદાવાદીઓ પોતાની જાતને સુરક્ષિત મહેસૂસ કરે તે માટે પોલીસ દ્વારા સ્પેશિયલ કોમ્બિંગ હાથ ધરવામાં આવ્યું હતું. કોમ્બિંગ દરમિયાન પોલીસે હજારો વાહન ડિટેઇન કર્યાં હતાં. આ સાથે દારૂની બોટલો લઇ જતા ખેપિયા-નબીરા પણ ઝડપાયા હતા, જ્યારે સંખ્યાબંધ હથિયાર સાથે ટપોરીઓને ઝડપી લીધા હતા.

પોલીસની આ કામગીરીના કારણે બુટલેગર્સને રોવાના દિવસો આવી ગયા છે. ઠેરઠેર કોમ્બિંગ અને ચેકિંગના કારણે બુટલેગર્સ દારૂ બીજા રાજ્યમાંથી લાવતાં પહેલાં દસ વખત વિચાર કરી રહ્યા છે. કેટલાક બુટલેગર્સ તો કોમ્બિંગ નાઈટ પહેલાં એટલે કે દિવસે દારૂ લાવી દેતા હોય છે. ડરના માહોલમાં દારૂનો ધંધો કરતા બુટલેગર્સને હવે સંપૂર્ણ ધંધો બંધ કરી દેવાની સૂચના આપી દેવાઈ છે.