જયપુરમાં અગ્નિકાંડઃ ટ્રકે ટક્કર માર્યા બાદ કેમિકલ ટેન્કરમાં ભીષણ વિસ્ફોટ, પાંચ લોકો જીવતા ભૂંજાયા

૩૫થી વધુ લોકો ગંભીર રીતે દાઝ્યાઃ ૪૦ વાહનોમાં આગ, ફેક્ટરી બળીને ખાખ, અજમેર હાઈવે બંધ

રાજસ્થાનના જયપુરમાં પેટ્રોલ પંપ નજીક એલપીજી ભરેલા ટેન્કર અને સીએનજી ટ્રક વચ્ચે થયેલા ભીષણ અકસ્માત બાદ મોતનું તાંડવ જોવા મળ્યું હતું. આજે વહેલી સવારે જયપુરમાં અજમેર હાઈવે પર દિલ્હી પબ્લિક સ્કૂલ સામે કેમિકલથી ભરેલા ટેન્કરમાં ભયાનક વિસ્ફોટ થયો હતો. આ દર્દનાક અકસ્માતમાં પાંચ લોકો જીવતા ભૂંજાઈ ગયા હતા અને ૩૫ લોકો ગંભીર રીતે દાઝી ગયા હતા. ટેન્કરને ટ્રકે ટક્કર મારી હતી, જેના કારણે ટેન્કરમાં ભીષણ વિસ્ફોટ થયો હતો અને સળગતું કેમિકલ ૨૦૦થી ૩૦૦ મીટર દૂર સુધી ફેલાઈ ગયું હતું. જ્યાં જ્યાં કેમિકલ ઢોળાયું હતું ત્યાં આગ ફાટી નીકળી હતી.