હાલમાં દેશનાં ઘણાં રાજ્ય કાતિલ ઠંડીની ઝપટમાં દક્ષિણ ભારતનાં કેટલાંક રાજ્યમાં વરસાદની શક્યતા

આજે બિહાર, હિમાચલ, ઉત્તરપ્રદેશ, આસામ, મેઘાલય, નાગાલેન્ડ, મણિપુર, મિઝોરમ, ત્રિપુરામાં ગાઢ ધુમ્મસનું એલર્ટ

હાલમાં દેશનાં ઘણાં રાજ્ય કાતિલ ઠંડીની ઝપટમાં છે. રાજસ્થાન અને હિમાચલ પ્રદેશના કેટલાક વિસ્તારમાં તાપમાન ઝીરો ડિગ્રી સુધી પહોંચી ગયું છે, જોકે દિલ્હી એનસીઆરમાં બપોરના સમયે તડકાના કારણે લોકોને થોડી રાહત મળી છે. કોલ્ડવેવ અને ગાઢ ધુમ્મસને લઈ હવામાન વિભાગે એલર્ટ જાહેર કર્યું છે. હવામાન વિભાગના જણાવ્યા અનુસાર જમ્મુ-કાશ્મીર, હિમાચલ પ્રદેશ અને ઉત્તરાખંડના પહાડી વિસ્તારોમાં હિમવર્ષાના કારણે તાપમાનમાં ભારે ઘટાડો થઈ શકે છે, જ્યારે દક્ષિણ ભારતનાં કેટલાંક રાજ્યમાં વરસાદની શક્યતા છે અને એમપી-રાજસ્થાન, પંજાબ, હરિયાણામાં કોલ્ડવેવનું એલર્ટ છે. આજે અને આવતી કાલે રાજસ્થાનના બિકાનેર, જયપુર, ભરતપુર ડિવિઝનની સાથે અજમેર વિભાગના કેટલાક ભાગોમાં હળવોથી મધ્યમ વરસાદ પડશે.

આવતી કાલે દિલ્હી-એનસીઆરમાં વરસાદની સંભાવના છે. હિમાચલ પ્રદેશ, પંજાબ, રાજસ્થાન, જમ્મુ-કાશ્મીર અને લદાખના જુદા જુદા વિસ્તારમાં આગામી કેટલાક દિવસો સુધી ઠંડીનું મોજું ચાલુ રહેશે. હવામાન વિભાગે આવતી કાલે કેટલીક જગ્યાએ હળવો વરસાદ અથવા હિમવર્ષા થવાની આગાહી કરી છે.