12 ஆண்டு சாதனையை இழந்த இந்தியா

இந்தியாவின் மகாராஷ்டிர மாநிலம், புனேவில் நடைபெற்ற நியூசிலாந்துக்கு எதிரான இரண்டாவது டெஸ்ட் போட்டியில் 113 ஓட்டங்கள் வித்தியாசத்தில் சனிக்கிழமை (அக்டோபர் 26) தோல்வியுற்ற இந்திய அணி, டெஸ்ட் தொடரையும் இழந்துள்ளது.

டெஸ்ட் போட்டிகளில் முன்னணி அணியாகத் திகழ்ந்து வந்துள்ள இந்தியா, அடுத்தடுத்து இரு போட்டிகளில் தோல்வியடைந்திருப்பது ரசிகர்களுக்கு ஏமாற்றம் அளித்துள்ளது.

இந்தப் போட்டியின் முதல் இன்னிங்ஸில் நியூசிலாந்து அணி 259 ஓட்டங்களும் இந்திய அணி 156 ஓட்டங்களும் எடுத்திருந்தன. இரண்டாவது இன்னிங்ஸில் ஐந்து விக்கெட் இழப்பிற்கு 198 ஓட்டங்கள் என்ற நிலையில், நியூசிலாந்து அணி மூன்றாவது நாள் ஆட்டத்தை சனிக்கிழமை தொடர்ந்தது.

அணியின் ஓட்ட எண்ணிக்கை 231ஆக இருந்தபோது, டாம் பிளண்டல் 41 ஓட்டங்களிலும் கிளென் ஃபிலிப்ஸ் 48 ஓட்டங்களிலும் ஆட்டமிழந்தனர். முடிவில் 255 ஓட்டங்களில் நியூசிலாந்து அணி ஆட்டமிழந்தது.