‘மசெக வெற்றிக்கு உத்தரவாதம் இல்லை'

வரவிருக்கும் பொதுத் தேர்தலில் மக்கள் செயல் கட்சி (மசெக) வெற்றிபெற்று நிலையான அரசாங்கம் அமைந்திடும் என்று அசட்டையாக இருந்துவிட வேண்டாம் என்று பிரதமர் லாரன்ஸ் வோங் கட்சியினரிடம் எச்சரித்துள்ளார். வரும் 2025ஆம் ஆண்டுப் பொதுத் தேர்தலில் சவால்கள் அதிகம்; வெற்றிக்கு உத்தரவாதம் இல்லை என்றார் அவர்.

மசெக மாநாட்டில் ஞாயிற்றுக் கிழமை (நவம்பர் 24) உரையாற்றிய திரு வோங், அடுத்த ஆண்டு நடைபெறவிருக்கும் பொதுத் தேர்தலில் ஒருவேளை ஆளுங்கட்சிக்கு எதிராக மிதமான வகையில் மக்களின் வாக்குகள் செல்ல நேரிட்டால் சிங்கப்பூரில் பலவீனமான அரசாங்கம் அமையும் அபாயம் உள்ளது என்று கூறினார்.

"சிங்கப்பூரர்கள், மசெக அரசு அமைத்து, ஆட்சி செய்ய வேண்டும் என்று எண்ணுகின்றனர். அதற்காக அவர்களுக்கு நன்றி கூறுகிறேன். இருப்பினும், நாடாளுமன்றத்தில் அதிக எதிர்க்குரல்களும் வேண்டும் என்றும் அவர்கள் கருதுகின்றனர்.

“அதிக அளவிலான எதிர்க்குரல்கள் ஒலிக்க வேண்டும் என்ற ஆர்வத்தால், நிலையான, நல்ல அரசாங்கத்தை இழக்கக்கூடிய அபாயத்தை நாம் எதிர்நோக்குகிறோம்,” என்றார் திரு வோங்.

முடிந்தவரை மக்களுக்கு உதவும் அரசாங்கம்