பொள்ளாச்சித் திரை விழாவில் சிங்கப்பூர் இயக்குநரின் ஆவணப்படத்திற்கு விருது

கிட்டத்தட்ட எட்டு ஆண்டுகளாக நீடித்துவரும் படப்பிடிப்பு பயணத்தைப் பின்னோக்கிப் பார்க்கும்போது அதில் மனநிறைவு காண்பதாக உள்ளூர் நடிகரும் இயக்குநருமான சேஷன் வீரப்பன், 29, கூறினார்.

- கி கி. ஜனார்த்தனன்

2016ல் 'தேடல்' என்ற நிகழ்ச்சியில் பங்கேற்ற இவர், 'வேட்டை 4', 'வேட்டை 5', 'அடுக்கு வீட்டு அண்ணாசாமி’, 'காலவரை', 'இறுதிப் பயணம்' உள்ளிட்ட பல்வேறு உள்ளூர்த் தொலைக்காட்சி நாடகங்களில் நடிகர், உதவியாளர், துணை இயக்குநர் என வெவ்வேறு பொறுப்புகளை ஏற்றுச் செயல்பட்டார்.

இவர் வெற்றி இப்போது கடல்கடந்து நிற்கிறது. அக்டோபர் மாத பிற்பகுதியில் தமிழகத்தின் பொள்ளாச்சியில் நடைபெற்ற குறும்படப் போட்டியில் சிறந்த ஆவணப்படத்திற்கான விருதைப் பெற்றார் சேஷன்.

ஆயிரத்திற்கும் மேற்பட்ட குறும்படங்கள் சமர்ப்பிக்கப்பட்டதில் வெற்றி பெற்ற ஆறு படங்களில் சேஷனின் 'வாழ்க்கை தொடரும்' ("Life goes on") ஆவணப்படமும் தேர்வானது.

தாம் ரசிக்கும் புகழ்பெற்ற இயக்குநர் பி. லெனின் அந்த விருது நிகழ்ச்சிக்குச் சிறப்பு விருந்தினராக வந்திருந்ததாகக் குறிப்பிட்டார் இந்த இளம் இயக்குநர்.

கிட்டத்தட்ட இரண்டாண்டுக்கு முன்னர் லா சால் கலைக்கல்லூரியில் பயின்றபோது, தமது இறுதியாண்டு பணித்திட்டத்திற்காக புதினப் படைப்பு ஒன்றை உருவாக்கத் தாம் எண்ணியிருந்ததாகவும் அதற்குப் பதிலாக ஆவணப்படத்தை உருவாக்கும்படி பள்ளியைச் சேர்ந்த திரு சார்ல்ஸ், ஒரு வழிகாட்டியாகத் தமக்கு அறிவுறுத்தியதாகவும் சேஷன் கூறினார்.