உடற்குறையுள்ளோர் பல வழிகளில் முன்னேற்றம்: ஆய்வு

சிங்கப்பூரில் உடற்குறையுள்ள பட்டதாரிகள் பல வழிகளில் முன்னேறிச் செல்கின்றனர்.

அவர்களுடைய வாழ்க்கைத் தரமும் முன்பைவிட சற்று மேம்பட்டுள்ளது.

சிறப்புக் கல்வி பள்ளிகளைச் சேர்ந்த அதிக பட்டதாரிகள் வேலை, பயிற்சி, உயர் கல்வி நிலையங்களில் மேற்படிப்பு என்று முன்னேறி வருகின்றனர்.

அந்த வகையில், 2023ஆம் ஆண்டில் அவர்களில் ஏறக்குறைய 57 விழுக்காட்டினர் இந்த முன்னேற்றப் பாதையில் சென்றுள்ளனர். இது, 2016ஆம் ஆண்டில் 51.3 விழுக்காடாக இருந்தது.

கல்வி அமைச்சின் பட்டதாரி வேலைவாய்ப்பு ஆய்வு இந்த விவரங்களைத் தெரிவிக்கிறது.

எஞ்சிய பட்டதாரிகள் வயது வந்தோருக்கான உடற்குறையுள்ளோர் சேவை, பயிலரங்கு, பகல்நேர நடவடிக்கை நிலை யங்கள் அல்லது வீட்டுப் பராமரிப்புக்கு பதிந்துகொண்டனர்.

டிசம்பர் 2ஆம் தேதி திங்கட்கிழமையன்று சமுதாய, குடும்ப மேம்பாட்டு அமைச்சின் முதலா வது 'உடற்குறைப் போக்குகள்' பற்றிய அறிக்கையில் இந்த விவரங்கள் பட்டியலிடப்பட்டிருந்தன.

இந்த அறிக்கை, உடற்குறையுள்ளோர் தொடர்பான போக்குகள் பற்றியும் அவர்களுடைய பராமரிப்பாளர்கள் பற்றியும் தெரியப்படுத்துகிறது.

அனைவரையும் உள்ளடக் கிய வேலை வாய்ப்பு, தரம், பராமரிப்பு ஆதரவு, உடற்குறையுள்ளோர் மீதான பொதுமக்களின் எண்ணம் உள்ளிட்டவை ஆய்வில் கண்டறியப்பட்டது.

உடற்குறையுள்ளோருக்கான வேலை வாய்ப்பு 2019ஆம் ஆண்டில் 28.2 விழுக்காட்டிலிருந்து 2023ஆம் ஆண்டில் 32.7 விழுக்காட்டுக்கு அதிகரித்துள்ளது என்று மனிதவள அமைச்சின் பரந்த அளவிலான ஊழியர் அணி தெரிவிக்கிறது.