சிந்துவெளி எழுத்துப் புதிரை விடுவிப்பவர்களுக்கு 1 மி. அமெரிக்க டாலர் பரிசு: முதல்வர் ஸ்டாலின்

சென்னை: தமிழ்நாடு அரசின் தொல்லியல் துறை சார்பில் 5.1.2025ஆம் தேதி பன்னாட்டுக் கருத்தரங்கு தொடங்கப்பட்டுள்ளது. இந்தக் கருத்தரங்கை முதல்வர் மு.க.ஸ்டாலின் தொடங்கி வைத்து ‘சிந்துவெளி வரிவடிவங்களும் தமிழ்நாட்டுக் குறியீடுகளும்: ஒரு வடிவவியல் ஆய்வு’ என்னும் நூலை வெளியிட்டு உரையாற்றினார்.

மூன்று நாள்கள் நடைபெறவிருக்கும் இந்தக் கருத்தரங்கில் வெளிநாடுகள் மற்றும் வெளிமாநிலங்களைச் சேர்ந்த 24 ஆய்வாளர்கள், தொல்லியலாளர்கள் கலந்துகொள்கின்றனர். அவர்கள் சிந்துவெளி நாகரிகம் மற்றும் இந்தியத் துணைக் கண்டத்தில் மற்ற நாகரிகங்கள், பண்பாடுகள் குறித்து பல்வேறு தலைப்புகளில் தங்களுடைய ஆய்வுரைகளை வழங்குகின்றனர்.