'అవతార్ చిత్రానికి స్ఫూర్తి 'టియాంజీ'

చైనా హువాంగ్ ప్రావిన్సీ లోని జంగ్జియాజీ అనే పట్టణం సమీపంలో ఒలింగ్ ఇవాన్ ఈశాన్య ప్రాంతంలో జంగ్జియాజీ పర్వతాలు నెలకొని ఉన్నాయి

- షేక్ అబ్దుల్ హకీం జాని

వీటిని టంగ్జియాజీ పర్వతాలు అని కూడా పిలుస్తారు. అన్నింటి కంటే ప్రధాన పర్వతం టియాంజీ పర్వతం. మొత్తం 16 వేల 550 ఎకరాలలో ఇవి విస్తరించి ఉన్నాయి. ఇన్ని వేల ఎకరాలలో కొన్ని వందల పర్వతాలు ఆకాశ హర్మ్యాల్లా పదునైన శిఖర కొనలతో ఎత్తైన స్తంభాల్లా విస్తరించి ఉన్నాయి. ఈ పర్వతాలు పెన్సిల్ను నిలబెట్టినట్లు ఉంటాయి. 1982 నుండి చైనా ప్రభుత్వం దీన్ని జాతీయ ఉద్యానవనంగా ప్రకటించింది. టియాంజీ అంటే చైనా భాషలో స్వర్గపుత్రుడు అని అర్థం. యునెస్కోవారు దీన్ని ప్రపంచ వారసత్వ ప్రదేశంగా ప్రకటించారు.

టియాంజీ అనే పేరు ఎందుకు వచ్చింది?

ఈ పర్వతాలకు టియాంజీ పర్వతం అనే పేరు రావడానికి స్థానికులు ఒక కథ చెబుతారు. సాంగ్ వంశం చివరి దశలో టుజియా గిరిజన తెగ ఉండేది. ఆ తెగ నాయకుడి పేరు టియాంజీ. ఈ పర్వతాలకు ఆయన పేరే పెట్టారు.టియాంజీ ఈ పర్వతాల్లోనే చనిపోయినట్లు చెబుతుంటారు.గిరిజన తెగకు చెందిన జియాంగ్ అనే వ్యక్తి 12వ శతాబ్దపు ప్రముఖుడు. ఆ సమయంలోనే స్థానిక రైతులను ఏకం చేసి వ్యవసాయంలో సంస్కరణలు తీసుకుని వచ్చి రైతు తలరాత మార్చాడు. అప్పటి నుండి అతడ్ని టియాంజీ అని జనం పిలుచుకునేవారు. భగవంతుడే అతడ్ని తమకోసం దివి నుండి భువికి పంపాడని అప్పటి స్థానికుల ప్రగాఢ విశ్వాసం.రాజరికం రాజ్యమేలుతున్న ఆ కాలంలో రాజును మించిన గౌరవాన్ని టియాంజీ పొందారు. ఆయన ఈ పర్వతం పైనే కన్ను మూశాడు. ఆయన ఆత్మ ఇక్కడ తిరుగుతుందని నేటికీ గిరిజన తెగలవారు నమ్ముతారు. స్థానికులు ఈ పర్వతాలను టియాన్మన్ మౌంటెన్స్ అని కూడా పిలుస్తారు. పర్వతం పై భాగానికి చేరడానికి లిఫ్ట్ సౌకర్యం ఉంది. అక్కడ నుండి కేబుల్ కార్లలో ఈ ప్రకృతి అందాలను వీక్షించవచ్చు.

అద్భుతాలకు నిలయం