ఐస్లాండ్ చూసొద్దామా!

ఉత్తర అట్లాంటిక్ మహాసముద్రం మధ్యలో వున్న ఒక చిన్న ద్వీపదేశం ఐస్లాండ్.

- అయ్యగారి సుజాతరావు

చుట్టు నాలుగువైపులా అంతులేని జలనిధి గల ఆ ద్వీపదేశంలో మంచుపర్వతాల అందాల గురించి ఎంత చెప్పుకున్నా తక్కువే. రెండు కళ్లు చూసేందుకు కూడా చాలని ఈ ప్రకృతి అందాలను చూసేందుకు పర్యాటకులు చాలామందే వస్తుంటారు. ఈ ప్రాంతానికి అయ్యగారి సుజాతరావు తన కుటుంబంతో వెళ్లి, అక్కడ పర్యాటక వివరాలను, ప్రకృతివాతావరణం గురించి వారి మాటల్లోనే తెలుసుకుందాం.

ఐస్లాండ్లో మంచుకొండలతోపాటు అగ్నిపర్వతాలు, అవి విరజిమ్మే లావాలు, మైదాన ప్రాంతాల్లో ఇసుక భూములు, మంచు ఖండాల నుండి వచ్చేనదులు, మంచు కరిగి పర్వతాలపై నుండి దుమికే జలపాతాలు, ఆ జలపాతాలతో నేలపై ఏర్పడే నదులు, సరస్సులతో అలరారే ఆహ్లాదకరమైన వాతావరణం గల ఆ ప్రాంతాలన్ని చూడాలనే ఆసక్తితో ఐస్లాండు వెళ్లాం. ప్రస్తుతం మేం అమెరికా ఒహాయో రాష్ట్రంలోని సిన్సినాటి నగరంలో నివసిస్తున్నాం. కెఫ్లావిక్ ఎయిర్పోర్ట్ నుండి బయలుదేరి బ్లూలగూన్ అనే వేడినీటి సరస్సు దగ్గరకు వెళ్లాం. అది మానవ నిర్మిత సరస్సు, ఈ సరస్సులో స్నానం చేస్తే అలర్జీలు, రుగ్మతలు తగ్గిపోతాయని అంటారు. అంతేకాదు ఇది 25వ ప్రపంచవింతగా వాసికెక్కింది.