സഹജീവിസ്നേഹം നൽകുന്ന അമരത്വം

ജീവിതത്തിൽ ഒരു വ്യക്തിയുടെ കൈവശം മാത്രമായി ധനം തങ്ങിനിൽക്കില്ല. പക്ഷേ, ധർമ്മം എന്നെന്നും നിലനിൽക്കുന്നതാണ്

- സംഗീത മധു

ഒരു ധനികനായായിരുന്നു മുജ്ജന്മത്തിൽ ദേവന്റെ പിറവി. ദാനധർമ്മങ്ങളിൽ അതീവ തൽപ്പരനുമായിരുന്നു. ധർമ്മിഷ്ഠൻ എന്ന് അദ്ദേഹത്തെ വാഴ്ത്താനും ധാരാളം ആളുകളുണ്ടായിരുന്നു.

അങ്ങനെ ദാനധർമ്മങ്ങൾ ചെയ്തുവന്ന ദേവന്റെ വീട്ടിലെ എല്ലാ വസ്തുക്കളും ഒരുനാൾ മോഷ്ടാക്കളെത്തി കവർന്നുകളഞ്ഞു. ആ വിവരം അടുത്ത ദിവസം രാവിലെ ഉറക്കമുണർന്നപ്പോൾ മാത്രമാണ് ദേവൻ മനസ്സിലാക്കിയത്.

എന്നാൽ മോഷ്ടാക്കൾ കൊണ്ടുപോകാത്ത രണ്ട് വസ്തുക്കൾ അവിടെ അവശേഷിച്ചിരുന്നു. ഒരു അരിവാളും ഉപയോഗശൂന്യമായ ഒരു കൂടയും.

അതിൽ ദേവൻ ഏറെ സന്തോഷവാനായിരുന്നു. ഹോ... ഇതെങ്കിലും മോഷ്ടാക്കൾ ബാക്കിവെച്ചല്ലോ എന്നതായിരുന്നു സന്തോഷത്തിന്റെ ഒരു കാരണം.