പരിസ്ഥിതി പടിക്ക് പുറത്താകുമ്പോൾ

ശാസ്ത്രകേരളം

- ഡോ. സംഗീത ചേനംപുല്ലി ഫോൺ: 9744845550

അരിക്കൊമ്പൻ എന്ന ആനയുടെ പുനരധിവാസവുമായി ബന്ധപ്പെട്ട മനുഷ്യ-വന്യജീവി സംഘർഷങ്ങൾ വാർത്ത യിൽ നിറഞ്ഞു നിൽക്കുന്ന സമയത്താണ് വീണ്ടുമൊരു അന്താരാഷ്ട്ര പരിസ്ഥിതിദിനം വന്നെത്തുന്നത്. അരിക്കൊമ്പനെ സ്ഥാനം മാറ്റുന്നതുമായി ബന്ധപ്പെട്ട ശാസ്ത്രീയ കാഴ്ചപ്പാടുകൾ ഒരു വശത്തും വൈകാരിക മായ പ്രതികരണങ്ങൾ മറുവശത്തും നിന്ന് പൊരിഞ്ഞ വാക്കുതർക്കത്തിൽ ഏർപ്പെടു ന്നത് നമ്മളെല്ലാം കണ്ടതാണ്. പരിസ്ഥിതി യെ സംബന്ധിച്ച് കൃത്യമായ അവബോധവും, ശാസ്ത്രീയമായ കാഴ്ചപ്പാടുകളും വിദ്യാഭ്യാ സത്തിലൂടെ രൂപപ്പെടേണ്ടതിന്റെ ആവശ്യകത വ്യക്തമാക്കുന്നതായിരുന്നു ഈ ചർച്ചകൾ. അതേസമയം എൻ.സി.ഇ.ആർ.ടി. പാഠ്യപദ്ധതി പരിഷ്കരണത്തിന്റെ ഭാഗമായി പല പാഠഭാഗങ്ങളും ഒഴിവാക്കിയ കൂട്ടത്തിൽ പരിസ്ഥിതിയുമായി ബന്ധപ്പെട്ട ചില പ്രധാന ഭാഗങ്ങൾ കൂടി ഉൾപ്പെട്ടിട്ടുണ്ട്. പഠനഭാരം ലഘൂകരിക്കുക എന്ന ഉദ്ദേശ്യത്തിലാണ് പാഠഭാഗങ്ങൾ ഒഴിവാക്കിയത് എന്ന് പറയുന്നുണ്ടെങ്കിലും ആധുനികമായ ലോക ബോധം നേടുന്നതിനും നിലനിർത്തുന്നതിനും നിർബന്ധമായും പഠിച്ചിരിക്കേണ്ടവയാണ് ഒഴിവാക്കപ്പെട്ട പാഠഭാഗങ്ങളിൽ പലതും എന്നത് ഇതിന് പിന്നിലെ രാഷ്ട്രീയ ദുരുദ്ദേശങ്ങളെപ്പറ്റി സൂചന നല്കുന്നുണ്ട്.

ഒഴിവാക്കിയ പാഠഭാഗങ്ങൾ

ഏഴാം ക്ലാസിലെ സയൻസ് പാഠപുസ്തകത്തിലെ പരിസ്ഥിതി, കാലാവസ്ഥ, കാലാവസ്ഥാമാറ്റത്തിനോടുള്ള മൃഗങ്ങളുടെ അനുരൂപനം എന്നിവ ഉൾപ്പെടുന്ന അദ്ധ്യായം പൂർണ്ണമായും ഒഴിവാക്കിയിട്ടുണ്ട്. നമ്മുടെ പരിസ്ഥിതിയെയും കാലാവസ്ഥയെയും പറ്റിയുള്ള അടിസ്ഥാനധാരണകൾ രൂപീകരിക്കാനുള്ള അവസരമാണ് ഇതിലൂടെ വിദ്യാർത്ഥികൾക്ക് നഷ്ടപ്പെടുന്നത്.