വായുമലിനീകരണം

നാം നേരിടുന്ന വലിയ വിപത്ത്

- കണക്കൂർ ആർ. സുരേഷ്കുമാർ ഫോൺ : 9930697447

പത്രവാർത്തകളിലും ടെലിവിഷൻ കാഴ്ചകളിലും ഇന്ന് വളരെയധികം ചർച്ചചെയ്യപ്പെടുന്ന ഒരു വിഷയമാണ് വായുമലിനീകരണം. പ്രത്യേകിച്ചു  ഉത്തരേന്ത്യൻ നഗരങ്ങളിലെ ദീപാവലിക്കാലത്ത് പടക്കങ്ങൾ പൊട്ടിച്ച ശേഷം അന്തരീക്ഷത്തിൽ കലരുന്ന പുകയും മറ്റ് വിഷവാതകങ്ങളും മലിനീകരണത്തോത് ഉയർത്തുന്നത് വാർത്തകളാകുന്നുണ്ട്. നഗരസമീപമുള്ള ഇടങ്ങളിലെ വയലുകളിൽ കൊയ്ത്തു കഴിഞ്ഞ് അവശേഷിച്ച വൈക്കോൽ കത്തിച്ചുകളയുന്നതും വായുമലിനീകരണത്തിന്റെ അളവ് വലിയ തോതിൽ വർദ്ധിപ്പിക്കുന്നു. വടക്കേ ഇന്ത്യയുമായി താരതമ്യപ്പെടുത്തിയാൽ കേരളം ഉൾപ്പെടെയുള്ള ദക്ഷിണേന്ത്യൻ സംസ്ഥാനങ്ങളിൽ സ്ഥിതി ഇപ്പോൾ വളരെ മെച്ചമാണ്. കേരളത്തിലെ വായുമലിനീകരണത്തിന്റെ തോത് പൊതുവിൽ വളരെ കുറവാണ്. എങ്കിലും നാം സൂക്ഷിച്ചില്ലെങ്കിൽ അത് ഭാവിയിൽ ഉയർന്നേക്കാം. തിരുവനന്തപുരം, കൊല്ലം, എറണാകുളം, തൃശ്ശൂർ, കോഴിക്കോട്, കണ്ണൂർ തുടങ്ങിയ ജില്ലകളിലെ ചില സ്ഥലങ്ങളിൽ വായുമലിനീകരണത്തിന്റെ തോത് ചിലപ്പോൾ അല്പം ഉയർന്നു കാണാറുണ്ട്. ഇപ്പോൾ വലിയ ഭീഷണി ഇല്ലെങ്കിലും കരുതൽ വേണം എന്നാ ണർത്ഥം.