മരുഭൂമിയിലെ സ്വപ്ന സഞ്ചാരികൾ

ഖത്തർ ന്യൂട്രൽ വേദിയാണ്. മൈതാനങ്ങളും കാണികളും എല്ലാവർക്കും ഒരുപോലെ. ആദ്യ റൗണ്ട് അടിസ്ഥാനമാക്കുക ആണെങ്കിൽ ഈ ലോകകപ്പിൽ എന്തും സംഭവിക്കാം

- എം.പി. സുരേന്ദ്രൻ

അറ്റമില്ലാതെ കിടക്കുന്ന പൊള്ളുന്ന മണൽപ്പരപ്പിൽ ഒട്ടകങ്ങളെയും നയിച്ചുകൊണ്ട് അവർ വരുന്നത് കാത്തിരിക്കുകയാണ് ലോകം. അവർ ജാലവിദ്യക്കാരെപ്പോലെ മിന്നൽപ്പിണരുകളെ സ്വപ്നങ്ങളാക്കി മാറ്റുന്നവരാണ്. മരുഭൂമി താണ്ടുമ്പോൾ, അവരുടെ പാദങ്ങൾ വിണ്ടുകീറിയിട്ടുണ്ടാകുമെങ്കിലും പ്രതീക്ഷകൾ അവരെ ഉന്മത്തരാക്കിയിരിക്കും. ഖത്തറിലെ മണൽപ്പരപ്പുകൾ താണ്ടിവന്ന മനുഷ്യരുടെ ജീവിതമാണ് ഒരു നാടോടിക്കഥയിലെന്നപോലെ അൽബെയ്ത്ത് സ്റ്റേഡിയത്തിൽ നിഴലും നിലാവുമായി നിറഞ്ഞത്. ഒരു കൈക്കുമ്പിൾ നിറയെ കാൽപ്പന്തിന്റെ മനോഹാരിത തണുപ്പിച്ചാറ്റിയ ദാഹജലത്തിനായി കൈ നീട്ടുമ്പോൾ 22-ാം മഞ്ഞക്കപ്പ് ഏത് രാജ്യത്തേക്ക് പറക്കും എന്നതൊരു ആകാംക്ഷയല്ല.

ലുസെയിൽ സ്റ്റേഡിയത്തിൽ കടൽ കടന്നുവന്ന ആൽബി സെലസ്റ്റേ, പ്രാർഥനാ നിർഭരമായ ഹൃദയത്തോടെ നിൽക്കുമ്പോൾ മരുഭൂമിയിലൂടെ കടന്നുവന്ന അറേബ്യൻ പോരാളികളുടെ ആരാധകർ, അതിലേറെ വീര്യത്തോടെ സൗദിയുടെ പോരാട്ടത്തിനായി കാത്തിരിക്കുകയായിരുന്നു. അവരുടെ കണ്ണുകൾ, അസൂയയോടെ, ലിയോ മെസ്സി എന്ന ജാലവിദ്യക്കാരന്റെ ബൂട്ടിലേക്ക് നോക്കിയിരിക്കണം. പന്ത്, അയാളുടെ കാലടക്കത്തിന്റെ പര്യായമായിരുന്നു. തുടർച്ചയായി 36 മത്സരങ്ങളിൽ എതിരാളികളെ കീഴടക്കിവന്ന അർജന്റീനയുടെ നായകനാണയാൾ. ആ മനസ്സിൽ, രാജ്യത്തിന്റെ ട്രോഫി റൂമിലേക്ക് ഒരു ലോകകിരീടംകൂ ടി എന്നൊരു കിനാവുണ്ട്.

പത്താമത്തെ മിനിറ്റിൽ സൗദികൾ ചകിതരായി. പടവുകളിൽ പ്രാർഥന നിറഞ്ഞു. ആ പെനാൽട്ടി മെസ്സി ലക്ഷ്യത്തിൽ എത്തിച്ചപ്പോൾ ആ രാജ്യം ഇതാ യാത്രയാരംഭിച്ചു എന്നാണ് തോന്നിയത്. എന്നാൽ ഒന്നാം പകുതി കഴിഞ്ഞപ്പോൾ സൗദിയുടെ ലോക്കർ റൂമിൽ ഒരു പരിഭാഷകനൊപ്പം നിലയുറപ്പിച്ച ഹെർവെ റെനാർഡ് എന്ന പരിശീലകൻ, ഒരു സിംഹത്തെപ്പോലെ ഗർജിച്ചു. പരിഭാഷകൻ അതിനെക്കാൾ ഉച്ചത്തിൽ തീ പടർത്തുന്നതുപോലെ വാക്കുകൾകൊണ്ട് കളിക്കാരെ പൊള്ളിച്ചു. അവസാനം പറഞ്ഞത് ഇത്രമാത്രം, ചെല്ല്, പിച്ചിലേക്ക് ചെല്ല്, കീഴടക്ക്...