അച്ഛൻ പകർന്ന ജീവിതം

മുതിർന്ന മാധ്യമപ്രവർത്തകനും അധ്യാപകനുമായിരുന്ന എ.സഹദേവനെ മകൾ ചാരുലേഖ ഓർമിക്കുന്നു....

എനിക്ക് അച്ഛനോടൊപ്പമുള്ള 'വിലപ്പെട്ട ഒരുപാട് കുട്ടിക്കാല ഓർമകളുണ്ട്. എല്ലാ വൈകുന്നേരവും  ജോലി കഴിഞ്ഞെത്തിയാൽ ഒരു ചായകുടിച്ചതിനു ശേഷം അച്ഛൻ എന്നെയും കൂട്ടി വീട്ടിൽ നിന്നിറങ്ങും. ഓരോ ദിവസവും ഓരോ സ്ഥലം. റെയിൽവേ സ്റ്റേഷൻ, പച്ചക്കറിച്ചന്ത, മീൻ മാർക്കറ്റ്, പാടം, പറമ്പ്, അമ്പലം... എന്നിട്ട് ഓരോ സ്ഥലത്തെ കുറിച്ചും എനിക്ക് പറഞ്ഞുതരും. നമുക്ക് ചുറ്റുമുള്ള മരങ്ങളെയും പക്ഷികളെയും ചെടികളെയും അവയുടെ പൂർവികരെയും നമ്മൾ അറിഞ്ഞിരിക്കണം എന്ന പക്ഷക്കാരനായിരുന്നു അച്ഛൻ.അങ്ങനെ അന്ന് പറഞ്ഞുതന്ന കാര്യങ്ങളും കഥകളും ഇപ്പോഴും എന്റെ മനസ്സിലുണ്ട്. തീവണ്ടിയോഫീസുകളിൽ വീശിക്കാണിക്കുന്ന പച്ചക്കൊടിയും ചുവന്ന കൊടിയും എന്തിന്? സമാന്തരമായി നീളുന്ന പാളങ്ങളിൽ ഉരയുന്ന ലോഹച്ചക്രങ്ങളുടെ പ്രവർത്തനം എങ്ങനെ, ടാർ റോഡുകളിൽ റബ്ബർ ടയറുകളെന്തിന്?, ചരക്ക് തീവണ്ടിയും യാത്രാതീവണ്ടിയും തമ്മിലുള്ള വ്യത്യാസങ്ങളെന്തൊക്കെയാണ്... അങ്ങനെയങ്ങനെ ഓരോ വിവരണങ്ങളും കണ്ണ് മിഴിച്ച് കേട്ടിരിക്കും ഞാൻ. ആ സായാഹ്ന യാത്രകളൊക്കെയും പാഠപുസ്തകത്തിന്റെ താളുകൾ പോലെ പലതും പലതുമെന്നെ പഠിപ്പിച്ചു.