ആരോഗ്യരക്ഷ ഗർഭപാത്രം നീക്കിയശേഷം

ഗർഭപാത്രം നീക്കം ചെയ്യുന്ന ശസ്ത്രക്രിയക്ക് ശേഷം കൃത്യമായ ജീവിത ശൈലിയിലൂടെ ആരോഗ്യം തിരിച്ചു പിടിക്കാം

- പി.വി.സുരാജ്

സ്ത്രീശരീരത്തിലെ ഏറ്റവും പ്രധാനപ്പെട്ട അവയവമാണ് ഗർഭപാത്രം അഥവാ യൂട്രസ്, ഗർഭപാത്രവുമായി ബന്ധപ്പെട്ട് ഒട്ടേറെ തെറ്റിദ്ധാരണകൾ സമൂഹത്തിലുണ്ടായിരുന്നു. ഗർഭപാത്രം നീക്കം ചെയ്യുന്നത് സ്ത്രീയുടെ ആത്മാവിനെ എടുത്തു മാറ്റുന്നതിന് തുല്യമാണെന്ന് വിശ്വസിച്ചിരുന്ന ഒരു കാലം. ഇന്ന് ആധുനിക വൈദ്യശാസ്ത്രം ഏറെ പുരോഗമിച്ചു. ഗർഭപാത്രം നീക്കം ചെയ്യുന്ന ശസ്ത്രക്രിയ (ഹിസ്റ്ററക്ടമി) സാധാരണമായിക്കഴിഞ്ഞു. സിസേറിയൻ കഴിഞ്ഞാൽ സ്ത്രീകൾക്കിടയിൽ ഏറ്റവുമധികം നടക്കുന്ന ശസ്ത്രക്രിയയാണ് ഹിസ്റ്ററക്ടമി.

സർജറി എപ്പോൾ

ഗർഭപാത്രവുമായി ബന്ധപ്പെട്ട എല്ലാ പ്രശ്നങ്ങളുടെയും ഉത്തരമല്ല ഹിസ്റ്ററക്ടമി. ചിലരിൽ ഹോർമോൺ ചികിത്സയിലൂടെയും യൂട്രസിൽ നിക്ഷേപിക്കാവുന്ന ഹോർമോൺ ഉപകരണങ്ങളിലൂടെയും പ്രശ്നങ്ങൾ പരിഹരിക്കപ്പെടാറുണ്ട്. ഇത്തരം ചികിത്സകൾ പരാജയപ്പെടുമ്പോഴോ രോഗിയുടെ ജീവൻ തന്നെ അപകടത്തിലാവുമ്പോഴോ മാത്രമാണ് ശസ്ത്രക്രിയ എന്ന തീരുമാനത്തിലെത്തുന്നത്.

ഗർഭാശയ കാൻസർ, ഗർഭാശയഗള കാൻസർ, അമിതമായ ആർത്തവരക്ത സ്രാവം, ഗർഭാശയമുഴകൾ, അഡിനോമയോസിസ്, ഗർഭാശയത്തിന്റെ ഇറക്കം, ഗർഭിണിയായിരിക്കുമ്പോൾ പ്ലാസന്റ ഒട്ടിയിരിക്കുന്ന അവസ്ഥ, പ്രസവത്തോടൊപ്പമുള്ള അമിതരക്ത സ്രാവം എന്നീ സാഹചര്യങ്ങളിലാണ് ഹിസ്റ്ററക്ടമി ചെയ്യാറുള്ളത്.