മുടിയനും കേശുവും കുഞ്ഞുപെങ്ങളും

 ഉപ്പും മുളകും പോലെ അടിപൊളി കൂട്ടാണ് പാറുക്കുട്ടിയും ചേട്ടന്മാരും. ഓണത്തിൻറ ഓളത്തിനൊപ്പം അവർ ഒത്തുചേർന്നപ്പോൾ...

- ഷിനില മാത്തോട്ടത്തിൽ

മേക്കപ്പിട്ടു കാത്തിരുന്ന പാറുക്കുട്ടി (ബേബി അമേയയുടെ അടുക്കലേക്ക് കതകുതുറന്ന് മുടിയൻ ചേട്ടൻ (ഋഷി എസ്. കുമാർ) വന്നതും ഒച്ചയുയർന്നു. ആർത്തുചിരിച്ച് പാറുക്കുട്ടി. കുറച്ചുനാൾ കൂടി അവളെ കണ്ടതിന്റെ സന്തോഷം കൂക്കി വിളിച്ചറിയിച്ച് മുടിയൻ. ഇത്തിരി കഴിഞ്ഞപ്പോൾ കേശു (അൽ സാബിത്ത്) എത്തി. ആ ബഹളത്തിലേക്ക് ലയിച്ചങ്ങുചേർന്നു. പിള്ളേര് സ്ക്രീനിൽ കാണുന്നതുപോലെ തന്നെ. ഉരുളയ്ക്കുപ്പേരി പോലത്തെ ഡയലോഗുകൾ പറയാൻ മൂന്നുപേരും കട്ടയ്ക്കാണ്. ഒപ്പം പാരവെപ്പും കളിയാക്കലും. ഇവരുടെ കുസൃതിത്തരങ്ങളും വർത്തമാനങ്ങളും ആവാഹിച്ചെടുത്താണോ "ഫ്ളവേഴ്സ് ചാനലിലെ ഉപ്പും മുളകും സീരിയലിന് തിരക്കഥയെഴുതിയിരിക്കുന്നതെന്ന് ഒരു നിമിഷം തോന്നിപ്പോയി.

സ്ക്രീനിൽ കാണിക്കുന്നതിന്റെ ഇരട്ടി വികൃതിത്തരങ്ങളാണ് സെറ്റിൽ പാറുക്കുട്ടി കാട്ടിക്കൂട്ടുന്നതെന്ന് കേശുവും മുടിയനും പറഞ്ഞു. ശിവാനിയും പാറുക്കുട്ടിയും അടിയൊഴിഞ്ഞ നേരമില്ല. “ഒറ്റക്കുട്ടിയാണ് ശിവാനി. സഹോദരങ്ങളില്ലാത്തതിന്റെ സകല കൗതുകവും പാറുക്കുട്ടിയോടാണ് തീർക്കുന്നത്. ചുമ്മാ ഇരിക്കുന്ന കൊച്ചിനെ പിടിച്ചുതോണ്ടി കളിക്കും. തിരിച്ചവളുടെ കൈയിൽ നിന്ന് കിട്ടുമ്പോൾ നിന്നു ചിരിക്കുമെന്ന് പാറുക്കുട്ടിയുടെ അമ്മ ഗംഗ, ശിവാനി പാറുക്കുട്ടിക്ക് ആനിയാണ്. പിച്ചവെച്ചു നടന്ന പ്രായത്തിൽ ശിവാനിയെന്ന് വിളിച്ചപ്പോ കുഞ്ഞുപാറുവിന് നാക്കിൽ വന്നതങ്ങനെയാണ്. ഇപ്പോഴും അതു തുടരുന്നു.

ഈ നിമിഷം ലച്ചു (ജൂഹി)വും ശിവാനിയും കൂടി ഒപ്പമുണ്ടായിരുന്നെങ്കിലെന്ന് മുടിയൻ. രണ്ടും ഞങ്ങളുടെ ഡയലോഗിന് അപ്പുറത്തിരുന്ന് കൗണ്ടറടിച്ചേനെയെന്ന് കേശു.

കുഞ്ഞുവായിൽ വലിയവർത്തമാനം