കേരളത്തിന്റെ ക്വിസ്മാൻ

ക്വിസ് എന്നത് കുറേ ചോദ്യോത്തരങ്ങൾ കാണാതെ പഠിക്കലല്ല...''ക്വിസ്സിങ്ങിലെ രസകരമായ അനുഭവങ്ങൾ പങ്കുവയ്ക്കുന്നു കേരളത്തിന്റെ സ്വന്തം ക്വിസ്മാസ്റ്റർ സ്നേഹജ് ശ്രീനിവാസ്

- “അക്ഷര അർജുൻ

1770- ൽ ലണ്ടനിലെ ന്യൂഗേറ്റ്സിൽ വില്യം ആഡിസ് എന്ന വ്യക്തിയെ ഒരു ലഹളയ്ക്ക് പ്രേരണ നൽകി എന്ന കുറ്റത്തിന് ജയിലിലടച്ചു. ഒരുദിവസം ഭക്ഷണത്തോടൊപ്പം കിട്ടിയ മാംസത്തിന്റെ എല്ല് അയാൾ എടുത്തുവെച്ചു. ജയിലർക്ക് കൈ കൂലികൊടുത്ത് കുറച്ച് നാരുകളും പശയും സംഘടിപ്പിച്ചു. ഇവ മൂന്നും ഉപയോഗിച്ച് ഒരു ഉത്പന്നം തയ്യാറാക്കി. ജയിലിൽനിന്ന് പുറത്തിറങ്ങിയശേഷം ഇത് വിൽക്കാൻ ഒരു കമ്പനി സ്ഥാപിക്കുകയും ചെയ്തു. 1700-കളിൽ സ്ഥാപിക്കപ്പെട്ട കമ്പനി ഇന്നും നിലനിൽക്കുന്നുണ്ട്. ആ ഉത്പന്നം നമ്മൾ നിത്യവും ഉപയോഗിക്കുന്നുണ്ട്. എന്താണ് അത്? ക്വിസ് മാസ്റ്റർ സ്നേഹജ് ശ്രീനിവാസ് ചോദിച്ചു. ഒടുവിൽ ക്വിസ് മാസ്റ്റർ തന്നെ ഉത്തരം പറയേണ്ടി വന്നു...

“നമ്മൾ എല്ലാദിവസവും കൈയിലെടുക്കുന്ന ടൂത്ത് ബ്രഷാണ് ആ വസ്തു. സദസ്സ് വിസ്മയിച്ചു. ക്വിസ്സിങ് എന്ന ഗെയിമിനെ ജനകീയമാക്കിയ സ്നേഹ ജിന്റെ ഓരോ സെഷനുകളും ഇങ്ങനെ കഥയും കടങ്കഥകളുമായി ഗെയിം പോലെ മുന്നോട്ട് പോകുന്നതാണ്.

ക്വിസ് ലോകത്തേക്ക്

ചെറുപ്പം മുതലേ ആരാധിക്കുന്ന ഐ.എ.എസ്., ഐ.പി.എസ്. ഓഫീസർമാരൊക്കെ ക്വിസ്സിങ്ങിലൂടെ നേട്ടങ്ങൾ ഉണ്ടാക്കിയവരായിരുന്നു. ക്വിസ്മാസ്റ്റർ കെ.പി. സുനിലാണ് പ്രചോദനമായത്. അങ്ങനെയൊക്കെയാണ് ഈ മേഖലയിലേക്ക് എത്തുന്നത്. പരീക്ഷണങ്ങൾ നടത്തി ക്വിസ്സിങ്ങിന്റെ സാധ്യതകൾ ആസ്വദിക്കാൻ തുടങ്ങി. സ്നേഹജ് പറയുന്നു.