വീട്ടിലേക്കുള്ള വഴി

 അപ്രതീക്ഷിതമായി ജീവിതയാത്രയിൽ വഴിതെറ്റി അറിയാദേശത്ത് എത്തപ്പെട്ട മനുഷ്യർ... അവർക്ക് വീട്ടിലേക്കുള്ള വഴി കാട്ടിക്കൊടുക്കുകയാണ് ശിവൻ...

- സൂരജ് സുകുമാരൻ

പതിവ് പോലെ കുതിരവട്ടം മാനസികാരോഗ്യ കേന്ദ്രത്തിന്റെ ഗേറ്റ് കടന്നപ്പോൾ ഒരു തണുത്ത കാറ്റ് ശിവനെ വന്ന് പൊതിഞ്ഞു. വെള്ള ഷർട്ടണിഞ്ഞ ആ മെലിഞ്ഞ മനുഷ്യൻ സ്കൂട്ടറിൽ ഗേറ്റ് കടന്നപ്പോൾ സുരക്ഷാ ജീവനക്കാരൻ തെളിച്ചമുള്ള ഒരു ചിരി സമ്മാനിച്ചു. സ്കൂട്ടർ പാർക്കിങ് ഏരിയയിൽ ഒതുക്കി, ഉള്ളിലേക്ക് ശിവൻ നടന്നു. നോക്കിനിന്നവരുടെയെല്ലാം കണ്ണിൽ പ്രതീക്ഷകളുടെ സൂര്യോദയം. ശിവജി എന്ന് പേരുള്ള അന്തേവാസിയോടാണ് ശിവൻ അന്ന് സംസാരിച്ചത്. അധികം വിവരങ്ങളൊന്നുമില്ല, മാസങ്ങളേറയായി കുതിരവട്ടത്തെത്തിയിട്ട് സംസാരിക്കാൻ അൽപം മടിയനാണ് കക്ഷി. ഒരു ഫോൺ നമ്പർ ശിവജി, ശിവന് നേരെ നീട്ടി. ആരുടെ നമ്പറാണെന്നറിയാതെ ശിവൻ ഫോണിലെ പച്ചബട്ടൺ അമർത്തി. മൈലുകൾക്കപ്പുറം പുണ ഹദാസ്സറിലുള്ള വീട്ടിനുള്ളിൽ ഫോൺ മുഴങ്ങി. ശിവജി റാവത്തിന്റെ കുടുംബം മറുതലയ്ക്കൽ. മദ്യപാനം നിമിത്തം മാനസിക നില തകർന്ന് അഞ്ചുവർഷം മുമ്പ് നാടുവിട്ടിറങ്ങിയ ശിവജി റാവത്ത് വീണ്ടും കൂടണയാൻ പിന്നെ അധികം താമസമുണ്ടായില്ല. ചിരിച്ച മുഖത്തോടെ ശിവജിയെ യാത്രയാക്കി ഒന്നും സംഭവിക്കാത്തത് പോലെ കോട്ടുളിയിലെ തന്റെ വീട്ടിലേക്ക് സ്കൂട്ടറിൽ ശിവൻ യാത്ര തുടർന്നു.

അയാൾ അങ്ങനെയാണ്... കഴിഞ്ഞ ഏഴ് വർഷമായി കുതിരവട്ടം മാനസികാരോഗ്യ കേന്ദ്രത്തിലെ ഊരും പേരും അറിയാത്ത അന്യസംസ്ഥാനക്കാരായ അന്തേവാസികൾക്ക് തിരികെ വീട്ടിലേക്കുള്ള വഴികാട്ടി കൊടുക്കുകയാണ്. ഏഴ് വർഷം കൊണ്ട് 228 പേരെ സ്വന്തം നാടുകളിലേക്ക് തിരിച്ചെത്തിക്കാൻ കേന്ദ്ര ആഭ്യന്തര മന്ത്രാലയം റിട്ട. ഉദ്യോഗസ്ഥനും സാമൂഹ്യ പ്രവർത്തകനുമായ ശിവന് സാധിച്ചു. വീട്ടിലേക്കുള്ള വഴികൾ വരച്ച് തന്റെ അനുഭവ കഥകളുടെ ഭൂപടം ശിവൻ നിവർത്തിയിട്ടു....

കളക്ടർ ബ്രോ വിളിച്ചപ്പോൾ...