അങ്ങനെ ഒരു ദിനം

വീടുവിട്ട് ഇറങ്ങിപ്പോയ രണ്ട് കുട്ടികൾ... അവരെത്തേടി അലഞ്ഞ ആ ദിവസത്തിൻറ ഓർമയ്ക്ക്...

- കെ. എ. ശോഭനകുമാരി റിട്ട. ഹെഡ് മിസ്ട്രസ് ഡി. വി. എച്ച്. എസ്. എസ് കണ്ടങ്കരി

അളിയൻ വന്നത് നന്നായി' എന്ന തോപ്പിൽ ഭാസിയുടെ നാടകത്തിന്റെ പഠനം സ്കൂളിൽ നടത്തുകയുണ്ടായി. ശേഷം സ്ത്രീധനത്തെക്കുറിച്ച് കുട്ടികളുടെ സംവാദവും. പരിപാടിയിലെ കുട്ടികളുടെ സജീവ പങ്കാളിത്തം ഓർത്ത് സന്തോഷത്തിലാണ് അന്ന് ഞാൻ സ്കൂളിൽ എത്തിയത്. വണ്ടി പാർക്ക് ചെയ്യുന്ന നേരത്ത് ഹെഡ്മിസ്ട്രസ് ഓടിയെത്തി. ഉത്കണ്ഠയോടെ ഞാൻ ടീച്ചറുടെ മുഖത്തുനോക്കി.

“ഒമ്പതാം ക്ലാസ്സിലെ മീനു (യഥാർഥ പേരല്ല ) അവളുടെ ക്ലാസ്സിലെ ആനന്ദിന്റെ (യഥാർഥ പേരല്ല) ചേട്ടന്റെ കൂടെ എങ്ങോട്ടോ പോയി. ഇപ്പോൾ ആ ഭാഗത്ത് നിന്നു വന്ന കുട്ടികൾ പറഞ്ഞതാണ്. ചമ്പക്കുളം കഴിഞ്ഞു കാണും. ടീച്ചർ ഒന്നു പോയി നോക്കണം...'' ഇതായിരുന്നു കാര്യം.