തലവര മാറ്റിയ വര

സ്പെയിനിൽ ചിത്രപ്രദർശനം നടത്തി ശ്രദ്ധേയയായ കൊല്ലംകാരിയുടെ വിശേഷങ്ങൾ

-  ജി. ജ്യോതിലാൽ

ഇലഞരമ്പും മൺതരിയുമൊക്കെ വിരിയുന്ന വരയാണ് നിഷയുടേത്. അതിൽ പ്രകൃതിയുടെ വേദനകളുണ്ടാവും. മനുഷ്യനും പ്രകൃതിയും തമ്മിലുള്ള ലയഭംഗിയും. കുട്ടിക്കാലത്തേ ഒപ്പം കൂടിയ വര നിഷയെ യൂറോപ്പിലെത്തിച്ചു. സ്പെയിനിലെ ആൽബേസിറ്റിയിൽ ഒരു മാസം നീണ്ടു നിന്ന ചിത്രപ്രദർശനം കഴിഞ്ഞത്തിയ നിഷ ഗൃഹലക്ഷ്മിയോട് സന്തോഷം പങ്കുവച്ചു. ഇതുവരെ നാട്ടിലൊരു ചിത്രപ്രദർശനവും നടത്താത്ത ഈ കൊച്ച് എങ്ങനെ സ്പെയിൻകാരെ കൈയിലെടുത്തെന്നാണ് പലരും ചോദിക്കുന്നത്. അവിടുത്തെ പ്രശസ്ത ചിത്രകാരനായ അൽഫോൺസോ റൂയിസിനൊപ്പമാണ് പ്രദർശനം നടത്തിയത്. മറ്റുള്ളവർക്കുള്ള ഈ അത്ഭുതം സത്യം പറഞ്ഞാൽ എനിക്കുമുണ്ട്. എല്ലാത്തിനും അതിന്റേതായ സമയമുണ്ട് ദാസാ എന്ന ഡയലോഗ് ഞാൻ എന്നോടുതന്നെ ഇടയ്ക്കിടെ പറയും.

സ്പെയിനിലെ അരങ്ങേറ്റം