દંગલ ગર્લ: વિનેશ ફોગાટઅધિકારની લડાઈ કુસ્તીથી વધારે મુશ્કેલ છે જ્યાં હક માટે અવાજ ઉઠાવવો પડે..

વિનેશનો અર્થ પવિત્ર હોય છે અને વિનેશ ફોગાટ આ અર્થમાં પવિત્ર છે કે તેણે આ સ્થાન પ્રામાણિકતા અને મહેનતના લોહીપરસેવાથી પ્રાપ્ત કર્યું છે. તેનો સંઘર્ષ એક ગામની છોકરીની એવી મહાગાથા છે, જે સાંભળીને લોકોના રુવાંડા ઊભા થઈ જાય છે

વર્ષ ૨૦૧૬. રિયો ઓલિમ્પિક. કુસ્તીના મેટ પર ભારતની વિનેશ ફોગાટ અને ચીનની સુન યાન સામસામે હતી. મુકાબલો હતો ક્વાર્ટર ફાઈનલ અને વિનેશ સુન યાનના એક દાવમાં ફસાઈ હતી. ભારતીય રેસલરે પોતાની પ્રતિદ્વંદ્વીની પકડમાંથી બહાર નીકળવાની કોશિશ કરી અને આ સંઘર્ષમાં તેના જમણા ઘૂંટણને ઈજા થઈ હતી.

આ સમય વિનેશ ફોગાટ માટે સૌથી દર્દનાક સમય હતો, કારણ કે ત્યાર પછી તે રિયો ઓલિમ્પિકમાં આગળ નહોતી જઈ શકી. તે સમયે ધ્રુસકેબ્રુસકે રડતા વિનેશ ફોગાટે કહ્યું, “મને હજી પણ ખબર નથી કે શું થયું હતું. હું બસ રમવા ઈચ્છતી હતી, પણ મારા પગ કામ નહોતા કરી રહ્યા.”

"હું ઈચ્છતી હતી કે કોઈ મને દર્દ દૂર કરવાની દવા આપે. હું ફરીથી ત્યાં જવા ઈચ્છતી હતી. મેં હજી હાર નહોતી માની. હું હાર માનનાર નહોતી, પરંતુ એવું ન થયું. હું બધું જોઈ શકતી હતી અને ત્યાં નિઃસહાય પડી હતી.’’