સિંગલ મધર માટેની પેરન્ટિંગ ટિપ્સ

એવી કઈ બાબત છે જે સિંગલ મધરની મુશ્કેલીઓને દૂર કરી શકે છે, આવો તે વિશે જાણીએ..

તમે જીવનભર અપરિણીત રહેવાનો નિર્ણય કરી લીધો. પતિ સાથે વિચારોનું ન મળવું અથવા બીજા કોઈ કારણસર તમે એકલા રહેવાનો નિર્ણય કરી લીધો હોય તો તેમાં કોઈ ખરાબી નથી, કારણ કે જિંદગીને પોતાની રીતે જીવવાનો હક બધાને છે, પરંતુ જો બાળક તમારી સાથે હોય, તો તમારે એમ માનીને ચાલવું જોઈએ કે તમારા બાળકના કેટલાક જ્વલંત પ્રશ્નોનો તમારે સામનો કરવો પડશે. સ્પષ્ટ છે કે બાળક પોતાના મનની વાત તમારી સાથે શેર કરશે અને તે યોગ્ય પણ છે, કારણ કે ઘરની બહારની વ્યક્તિ પાસેથી ખબર નહીં તેને એવા જવાબ મળશે જે તેનામાં તાણ પેદા કરે અને તમારા પ્રત્યેની તેની માનસિકતાને નકારાત્મક બનાવી દે.

તેથી બાળક સાથેનો તમારો સંબંધ ફ્રી અને ઈમાનદારીભર્યો હોવો જોઈએ. એકબીજા સાથે મુક્ત મને ચર્ચાનું વાતાવરણ પણ હોવું જોઈએ, જેમાં બાળક કોઈ પણ જાતના સંકોચ વિના પોતાના દિલની વાત તમને કહી શકે.

અગાઉથી પ્રશ્નોના યોગ્ય જવાબની તૈયારી રાખો:

તમે સિંગલ મધર છો તો કેટલાક સામાન્ય પ્રશ્નો તમારું બાળક તમને ગમે તે સમયે પૂછી શકે છે, જેના માટે તમારે અગાઉથી તૈયાર રહેવું પડશે જેમ કે મારા પપ્પા કેમ નથી? બધાના પપ્પા તેમની સાથે રહે છે? મારા મિત્ર પૂછે છે કે પીટીએમમાં તારી મોમ એકલી કેમ આવે છે?

આવા અનેક પ્રશ્નોનો વરસાદ તમારું બાળક તમારી પર વરસાવી શકે છે, જેના જવાબ તમારે ક્યારેક ને ક્યારેક આપવા જ પડશે. તેથી આ પ્રશ્નો માટે અગાઉથી માનસિક રીતે તૈયાર રહો.