ગેજેટ્સ જ્યારે ટેવ બની જાય

તમે પણ મોબાઈલ, લેપટોપ વગેરેનો ખૂબ વધારે ઉપયોગ કરી રહ્યા હોય અને થોડીથોડી વારમાં જોતા હોય તો જરા આ વાત જાણો..

ગેજેટ્સના ગુલામ બનવું યોગ્ય નથી, કારણ કે તમે તેના ગુલામ બની ગયા હોય તો તેના ખરાબ થવા પર તમે તેના વિના એક દિવસ પસાર નહીં કરી શકો અને તમને તેના વિના જિંદગી નીરસ તથા અધૂરી લાગશે. તેથી આજ દિન સુધી તમે જે કર્યું છે તે થઈ ગયું છે, પરંતુ હવે પોતાની જિંદગીમાં ગેજેટ્સને એટલું મહત્ત્વ આપો, જેટલું આપવાની જરૂર હોય. ભૂલથી પણ પોતાને તેના ગુલામ બનવા ન દો.

આવો જાણીએ કેવી રીતે તેનાથી અંતર જાળવશો: 

આજે કોઈને ફોન નહીં કરું

પૂરો સમય મોબાઈલ સાથે ચોંટી રહેવાની આપણી ટેવ ખૂબ ખરાબ બની ગઈ છે. બસ થોડો નવરાશનો સમય મળ્યો નથી કે ફોનમાં ક્યારેક ગૂગલ પર કઈ જોવા લાગી જતા હોઈએ છીએ, તો ક્યારેક સોશિયલ મીડિયા પર ફોનથી પોતાના ફોટા અપલોડ કરતા હોઈએ છીએ, તો ક્યારેક બીજાએ મૂકેલી પોસ્ટમાં એટલો ઈન્ટરેસ્ટ બતાવતા હોઈએ છીએ કે જાણે તેના કરતા વધારે જરૂરી બીજું કોઈ કામ નથી.