જ્યારે શિશુના દાંત નીકળે

બાળકના દાંત નીકળતી વખતે માતાપિતાએ કેટલીક ખાસ વાતનું ધ્યાન રાખવું જરૂરી બની જાય છે..

બાળકના દાંતને નીકળતા જોવા દરેક પેરન્ટ માટે ખૂબ ખુશીની વાત હોય છે. બાળકનો પહેલો દાંત આવવાનો અર્થ એ થાય છે કે હવે શિશુ ખાવાપીવાની સામાન્ય નક્કર વસ્તુ ખાઈ શકશે, પરંતુ બાળક માટે દાંત નીકળવાની પ્રક્રિયા પીડાનું કારણ બની જાય છે, કારણ કે દાંત આવતી વખતે બાળકને દુખાવો, તાવ જેવી ઘણી બધી સમસ્યાનો સામનો કરવો પડે છે.

તમારું નાનું બાળક કોઈ કારણ વિના રડી રહ્યું હોય, દરેક વસ્તુને પોતાના મોંમાં નાખી રહ્યું હોય અથવા કારણ વિના પરેશાન રહેતું હોય તો આ સંકેત દાંત નીકળવાના હોઈ શકે છે. આમ કેટલાક બાળકોના દાંત આવવામાં મોડું પણ થાય છે. દાંત નીકળવાના ક્રમમાં શરીરમાં કેટલાક બદલાવ આવે છે, પરંતુ જાણકારીના અભાવે પેરન્ટ્સ સમજી નથી શકતા અને કારણ વિના પરેશાન થવા લાગે છે.

દાંત નીકળવાના લક્ષણ

વારંવાર રડવું અને પરેશાન દેખાવું જ્યારે દાંત નીકળતા હોય છે ત્યારે બાળકોના પેઢામાં તકલીફ થાય છે. આ સ્થિતિમાં તેઓ ચીડિયલ અને પરેશાન થઈ જાય છે. બરાબર ઊંઘી નથી શકતા.

પેટમાં સમસ્યા

જ્યારે બાળકોના દાંત નીકળતા હોય છે ત્યારે તેમને ડાયેરિયા એટલે કે લૂઝ મોશનની સમસ્યા થઈ શકે છે, જે ૨-૩ દિવસ સુધી રહે છે. કેટલાક બાળકો આ દિવસોમાં કબજિયાતની સમસ્યાથી પરેશાન રહે છે, જેથી તેમને પેટમાં દુખાવો થાય છે.