దీపావళి రోజు దీపాలంకరణ

భారతీయులు జరుపుకునే పండుగల్లో ముఖ్యమైనది దీపావళి. ఈ పండుగ రోజున ఇంటి అలంకరణ కోసం రకరకాల దీపాలు ఉపయోగిస్తుంటారు.

దీపావళి అంటేనే దీపాల పండుగ. ఈ రోజు ప్రతి ఇల్లు సర్వాంగ సుందరంగా కనిపిస్తుంది. మెరిసి పోతుంటుంది. పండుగ రోజు తమ ఇల్లు దేదీప్యమానంగా వెలగాలని ప్రతి ఒక్కరికీ ఉంటుంది. కేవలం దీపాలు మాత్రమే కాదు. విద్యుత్ దీపాలను పండుగ సందర్భంలో ఉపయోగిస్తుంటారు. రకరకాల క్యాండిల్స్ వాడుతుంటారు.

దేశమంతటా దీపావళి పండుగకు ఒకటి రెండు నెలల ముందే పండుగల సందడి మొదలవుతుంది. బాణసంచాల దుకాణదారులు, విద్యుత్ పరికరాల ఉత్పత్తిదారులు, అమ్మకం దారులు రకరకాల పద్ధతుల్లో దీపాలు, లైట్లు, మార్కెట్లోకి తీసుకురావడం మొదలుపెడతారు. సాధారణంగా ఇది జూన్, జులైలో మొదలవుతుంది. దీపావళి పండుగ రోజున ఇంటి అలంకరణ కోసం ఉపయోగించే దీపాల గురించి తెలుసుకుందాం.

సాధారణంగా పండుగ రోజు సాయంత్రం అలంకరణ కోసం మట్టి దీపాలను ఉపయోగిస్తారు. వీటిలో కొత్త కొత్త డిజైన్లు మార్కెట్లోకి వస్తుంటాయి.

వృత్తం, త్రికోణం, చతురస్రం, అష్టబుజి ఆకారాల్లో లభ్యమవుతాయి. ఇవి కాకుండా పూర్తిగా చిన్న కుండ ఆకారంలో గోడలపై పెట్టడానికి, వేలాడదీయడానికీ లభిస్తాయి. కొబ్బరి చిప్ప గోపురం ఆకారంలోనూ అమ్ముతారు. మట్టి దీపాలను వెలిగించడానికి ఆవనూనె లేదా నెయ్యి వాడుతారు. కానీ ఇప్పుడు వీటి కోసం ప్రత్యేకంగా దీపం నూనె అమ్ముతున్నారు. కొందరు మట్టి దీపాల స్థానంలో ఇత్తడి దీపాలను వాడుతారు. దీపం ఏదైనా దాని ఉద్దేశం పండుగ రోజున వెలుగులు నింపడమే.