பணத்தை இழக்கும் அப்பாவிகள்!

நமக்கு தெரிந்த நபர்களை போலவோ அல்லது குடும்ப உறுப்பினர் போலவோ குரலில் பேசி புகைப்படம் மற்றும் வீடியோ அனுப்பி மிரட்டிப் பணம் பறிக்கும் கும்பலின் மோசடி தற்போது விஸ்வரூபம் எடுத்துள்ளது.

- எஸ்.ரவீந்திரன்

வளரும் ஏஐ தொழில்நுட்பத்தை பயன்படுத்தி நூதன குற்ற சம்பவத்தில் ஈடுபட்ட கும்பல் கட்டுப்படுத்தப்படுமா எனும் கேள்வி தற்போது எழுந்துள்ளது.

ஏஐ தொழில்நுட்பத்தை பயன்படுத்தி நடந்த மோசடியில் சென்னையை சேர்ந்த பெண் ஒருவர் ரூ.1.75 லட்சத்தை இழந்துள்ளார். இது போன்ற மோசடிகள் எப்படி நடக்கிறது என பார்த்தால் சமூக வலைதளத்தில் இருந்து ஒரு குறிப்பிட்ட நபரின் வீடியோ பதிவு போன்றவற்றின் மூலம் அவரது குரல் மாதிரியை மோசடி கும்பல் எடுத்துக் கொள்கிறது. பின்பு அந்த குரல் மாதிரியை ஏஐ மூலம் குளோனிங் செய்து, அவருக்கு தெரிந்த நபர்களிடம் பேசி ஏமாற்றுகின்றனர்.

கன்னியாகுமரி மாவட்டம் சைமன் நகரைச் சேர்ந்த மாணவர், அயர்லாந்து நாட்டில் மேற்படிப்பு படித்து வருகிறார். சமீபத்தில் மாணவனின் தாயார் வாட்ஸ் ஆப் எண்ணிற்கு மர்ம அழைப்பு ஒன்று வந்துள்ளது. இந்திய தூதரகத்தில் பணிபுரியும் அதிகாரி எனக்கூறி தன்னை அறிமுகப்படுத்திய நபர் மிரட்டும் தோரணையோடு பேசியுள்ளார்.

அயர்லாந்தில் படிக்கும் அவரது மகன் குற்ற சம்பவத்தில் ஈடுபட்டிருப்பதாகவும், அவர் மீது வழக்கு பதிவு செய்யப்பட்டுள்ளதாகவும் கூறி மாணவனின் தாயாருக்கு அதிர்ச்சி கொடுத்துள்ளார். கேட்டதும் வெடவெடத்து போன பெண்ணுக்கு அடுத்த அதிர்ச்சி காத்திருந்தது. மாணவன் அழுவது போன்ற ஆடியோ பதிவு ஒன்றை அனுப்பி வைத்து அச்சுறுத்தியுள்ளார்.

தங்களது மகனை விடுவிக்க வேண்டுமென்றால் கேட்கும் பணத்தை தரும்படி கூறி மிரட்டியுள்ளார். அதை உண்மை என நம்பிய அந்த பெண், மர்ம நபர் கொடுத்த எண்ணிற்கு 'கூகுல் பே' மூலம் 85 ஆயிரம் ரூபாயை அனுப்பி உள்ளார்.

வாங்கிய பணம் போதாது இன்னும் தேவை என நிபந்தனை விதிக்க, தன் உறவினரின் 'கூகுல் பே கணக்கில் இருந்து 90 ஆயிரம் ரூபாயை அனுப்பி வைத்துள்ளார். பணம் வாங்கியதும் மர்ம நபர் வாட்ஸ்அப் எண்ணை ப்ளாக்கில் போட்டு மாயமானார்.

இதற்கிடையே தனது மகனுக்கு அழைத்துப் பேசிய போதுதான் இது திட்டமிட்ட மோசடி என தெரியவந்தது. வாடிக்கையாளர் சேவை மையத்தில் இருந்து பேசுவது போல இளைஞரின் குரலைப் பதிவு செய்து, அதை ஏஐ தொழில்நுட்பத்தின் மூலம் அழுவது போன்று மாற்றி, மெகா மோசடியை அரங்கேற்றியது அம்பலமானது.