இந்தியா முன்னேற இந்தி எதிர்ப்பு அவசியம்!

மொழி என்பது அறிவை முகப்பதற்கான கரண்டி. அது இலக்கண, இலக்கிய செழுமை நிறைந்ததாக இருந்தால் அதைப்பேசும் மக்கள் அறிவும், திறமையும் வளரும்.

- பரிதிபாலன்

காலத்துக்கும் நிலைத்திருப்பது மட்டுமல்ல, காலத்துக்கேற்ப தன்னை தகவமைத்துக்கொள்ளவும் அம்மொழிக்கு தகுதி இருக்க வேண்டும்.

இந்திய மண்ணில் தமிழ் போன்ற சில மொழிக்குத்தான் அந்த தன்மை இருக்கிறது. ஆனால், அம்மொழிகளையும் அழிக்கும் வகையில் இந்தி திணிப்பை புதிய கல்விக்கொள்கை மூலம் இந்திய அரசு மேற்கொள்கிறது.

விருப்பத்தேர்வாய் இந்தியை முன்மொழிந்த காலம் போய், இப்போது கட்டாயமாக கற்பிக்க வேண்டும் என்ற நிர்பந்தத்தில் தள்ளுகிறது.

தமிழக பள்ளிக் கல்வித்துறைக்கு வழங்க வேண்டிய நிதியை வழங்காதது பற்றி கேட்கப்பட்ட கேள்விக்கு பதில் அளித்த ஒன்றிய கல்வி அமைச்சர் தர்மேந்திர பிரதான், 'புதிய கல்விக் கொள்கையை தமிழக அரசு ஏற்றுக்கொள்ள மறுப்பதால் ரூ.2,152 கோடி அல்ல... 5000 கோடியை தமிழ்நாடு இழக்கும். மும்மொழியை ஏன் அமுல்படுத்தவில்லை' என்று ஆணவத் தொனியில் பதிலளித்துள்ளார்.

அதாவது இந்தியை ஏன் தமிழ் நாட்டில் கட்டாயமாக கற்பிக்கவில்லை என்பதுதான் அதன் உள்ளார்ந்த மிரட்டல்.

அவரது இந்தப் பேச்சுக்கு பல தலைவர்களும் பதிலடி கொடுத்துள்ளனர். காங்கிரஸ் தலைவரும் முன்னாள் இந்திய நிதியமைச்சருமான ப.சிதம்பரம், 'மாநில அரசின் மொழிக் கொள்கையை வகுப்பது மாநில மக்களின் உரிமை. இந்தி பேசும் மாநிலங்களில் ஒரு மொழிக் கொள்கை தான் பின்பற்றப்படுகிறது என்பது அவருக்குத் தெரியுமா? நாடாளுமன்றம் அனுமதித்த நிதியை இந்தி மொழியைக் கற்பிக்காத மாநிலத்திற்கு தரமாட்டோம் என்று கல்வி அமைச்சர் சொல்வது நாடாளுமன்றத்தை அவமதிப்பதாகும் என்று அவருக்குத் தெரியுமா?

தமிழ்நாட்டு மக்கள் ஒற்றுமையாக இருந்து இந்த ஆணவப் பேச்சுக்கு முடிவு கட்ட வேண்டும்' என்று கூறியுள்ளார்.

முதலில் எந்த மொழியை எதற்காக கற்க வேண்டும் என்ற அறிவார்ந்த யோசனை வேண்டும்.

அது இல்லாமல் இந்தியை படித்தால் வேலை கிடைக்கும் என்ற கானல்நீரை கைக்காட்டுவது ஒன்றிய அரசின் வழக்கமான புலம்பலாக உள்ளது.

வட இந்தியாவில் இந்தியை தாய் மொழியாக கொண்டவர்கள், இந்தி படித்தவர்கள் கால்வாசி பேருக்க ாவது வேலை கிடைத்துள்ளதா? என்ற கேள்வியை அவர்களிடம் கேட்டால்... நிச்சயம் பதில் வரப்போவதில்லை.