லவ் டுடே

சுப்புலட்சுமி பெண்கள் கல்லூரி பரபரப்பாய் இயங்கிக் கொண்டிருந்தது.. பட்டாம்பூச்சிகளாய் இளம்பெண்கள் கூட்டம் கூட்டமாய் திரிந்தனர்.

- வி.சகிதாமுருகன்

பெரும்பான்மையான கூட்டம் விளையாட்டு மைதானத்தில் குவிந்திருந்தது. ஏக்கர் கணக்கில் பரந்து விரிந்து கிடந்தது கல்லூரியின் விளையாட்டு மைதானம்.. அந்த வருடத்திற்கான ஸ்போர்ட்ஸ் டே கொண்டாட்டத்திற்கான குரூப் மேட்சுகள் அங்கங்கு நடந்து கொண்டிருந்தது. மாணவிகள் கூட்டம் அதிகமாக இருந்தது ஒரு ஓரமாக இருந்த கூடைப்பந்து மைதானத்தில்..

குரூப் ஏ- க்கும் குரூப் டி-க்கும் இடையில் இறுதிப்போட்டி ஆரம்பமாக இருந்தது.. இரு அணி வீராங்கனைகளும் எதிரெதிரே தங்கள் அணியின் தலைவிகளுடன் அணி வகுத்தனர்.. ஏ குரூப்பின் தலைவி அனிதா.. டி குரூப்பின் தலைவி தர்ஷிணி..

இருவரும் கை குலுக்கிக் கொண்டனர்.. நடுவர் நாணயத்தைச் சுண்டினார். தர்ஷிணி டெய்ல் என்றாள். தரையில் விழுந்தது தலை.. நடுவர் விசில் ஊத பந்து தர்ஷிணியின் கையில் கொடுக்கப்பட்டது..

ஆட்டம் தொடங்கியது. இரு அணி வீராங்கனைகளும் ஆக்ரோஷமாய் விளையாட ஆரம்பித்தார்கள்.. குறிப்பாய் அணித்தலைவிகள் அனிதா தர்ஷிணியின் ஆட்டத்தில் அனல் பறந்தது.. பந்தைக் கடத்துகையில் இருவரும் அடிக்கடி மோதிக் கொண்டனர். ஒருவர் கையிலிருந்து ஒருவர் பந்தைப் பறிக்க கடுமையாகப் போராடினர்..

ஒரு கணத்தில் அனிதா வேகமாக மோத தர்ஷிணி கீழே விழுந்தாள்.. கோபத்தில் எழுந்த தர்ஷிணி ஓடிச் சென்று அனிதாவின் ஜெர்சியைப் பிடித்தாள்.. நடுவர் விரைந்து வந்து இருவரையும் பிரித்து விட்டு தர்ஷிணியை எச்சரித்து விட்டு ஆட்டத்தை தொடரச் செய்தார்..

இடைவேளை.. ஏ குரூப் 24 புள்ளி டி குரூப் 22 புள்ளி.. தர்ஷிணியின் உள்ளத்தில் புயலடித்தது. அனிதா யோசித்தாள் 'ஏன் இந்த தர்ஷிணி இப்படி கோபப்படுகிறாள்...' தர்ஷிணியின் மனம் அவளைக் கேள்வி கேட்டது.. இந்த வருடமும் இவள் ஜெயித்து விடுவாளா? விடக்கூடாது இவளை இந்த வருடம் தோற்கடித்தே தீர வேண்டும்.. இடைவேளைக்குப் பின் ஆட்டத்தில் அனல் அடித்தது..