പൂക്കൾ മന്ദഹസിക്കുന്ന ദാറുൽഹിദായ

മലർമന്ദഹാസം മധുമാരി പൊഴിക്കുകയാണ് ആവണീശ്വരം ദാറുൽ ഹിദായയിൽ. അദ്ധ്യാപന ജോലി അവസാനിപ്പിച്ച് പൂക്കൾ വിടർത്താൻ ഹസീന ജബ്ബാർ തീരുമാനിക്കുമ്പോൾ എല്ലാവരുടേയും മുഖം കറുത്തു. ഇന്നിപ്പോൾ ദാറുൽ ഹിദായ എന്ന വീടിന്റെ മുറ്റത്ത് പൂക്കൾക്കൊപ്പം ഹസീന മന്ദഹാസം പൊഴിക്കുമ്പോൾ അവർ കൂടി ചേർന്നത് ആഹ്ലാദത്തിന്റെ പൊട്ടിച്ചിരിയായി മാറി. സംസ്ഥാന സർക്കാരിന്റെ ഉദ്യാനഷ്ഠ പുരസ്ക്കാരവും കയ്യിലെടുത്ത് ഹസീന മന്ദഹസിക്കുകയാണ്. പൂവ് ചിരിക്കുന്നതുപോലെ...

- എസ്.പി.ജെ

7 വർഷം മുമ്പാണ് ഹസീന പൂക്കളുടെ ലോകത്തേയ്ക്ക് എത്തുന്നത്. പൂക്കളോടുള്ള ഇഷ്ടം ഹോബിയാവുകയും തുടർന്ന് അതൊരു സംരംഭമാക്കി മാറ്റുകയും ചെയ്തു. സ്വന്തം കാലിൽ നിൽക്കാനുള്ള വരുമാനം തന്റെ പൂന്തോട്ട് കൃഷിയിൽ നിന്നും നേടാനാവുമെന്ന് ഹസീന പറയുന്നു. പ്രവർത്തിക്കുന്ന മേഖലയിൽ പ്രശസ്തയാവുക എന്ന ലക്ഷ്യബോധത്തോടെയുള്ള കാൽവയ്പ്പാണ് പുരസ്ക്കാരത്തിൽ എത്തിച്ചത്. കൃഷി വകുപ്പ് മന്ത്രി പി. പ്രസാദ് സാറാണ് പുരസ്ക്കാര വിവരം ഫോണിലൂടെ അറിയിക്കുന്നത്. ഒരു ലക്ഷം രൂപയും, സ്വർണ്ണമെഡലും, ഫലകവും, സാക്ഷ്യപത്രവും അടങ്ങുന്നതാണ് പുരസ്ക്കാരം ലഭിക്കുന്ന തുകയിൽ മുന്തിയഭാഗം റംസാന് സക്കാത്തായി നൽകാനും ബാക്കിയുള്ള തുക ഉദ്യാനത്തിന്റെ വിപുലീകരണത്തിനുമായി പങ്കുവയ്ക്കാനുമാണ് തീരുമാനം.

ഉദ്യാനക്കാഴ്ച

ഹസീന തയ്യാറാക്കിയ ഉദ്യാനത്തിലെ പച്ചപ്പിനുള്ളിൽ വർണ്ണങ്ങൾ വാരിവിതറിയും, ഇളകിയാടിയും, ചിരിച്ചും, കിന്നരിച്ചും വസന്തമൊരുക്കി പൂക്കൾ വിസ്മയക്കാഴ്ചയായി മാറുകയാണ്.