ഒരു പുഞ്ചിരിക്കപ്പുറം....

ആൽഫി പഞ്ഞിക്കാരൻ

ബി.ടെക്കും എം.ടെക്കും കഴിഞ്ഞ് 5 വർഷം ഐ.ടി ജോലിയിൽ തിളങ്ങിയ അങ്കമാലിക്കാരി ആൽഫി പഞ്ഞിക്കാരൻ സിനിമയിലേക്കെത്തിയത് ഒരു സിനിമാ കഥ പോലെയാണ്. ലോകത്തിലെ ഏറ്റവും വലിയ ഐ.ടി കമ്പനികളിലൊന്നിലെ ജോലി രാജിവച്ച് അഭിനയമോഹവുമായി ആൽഫി പരസ്യചിത്രങ്ങളിലും മോഡലിംഗിലും ശ്രദ്ധ തിരിച്ചു. ജോലിയിലാണെങ്കിലും സിനിമയിലാണെങ്കിലും 100% ആത്മാർത്ഥത പുലർത്തുന്ന ആൽഫിക്കരികിലേക്ക്  സിനിമ വൈകാതെ വന്നെത്തുകയും ചെയ്തു. നിരവധി സിനിമകളിൽ ചെറുതും വലുതു മായ വേഷങ്ങൾ കൈകാര്യം ചെയ്ത് സിനിമാമേഖലയിൽ തന്റേതായ ഇടം കണ്ടെത്തി ആൽഫി. ശിക്കാരി ശംഭുവിലെ മികച്ച പ്രകടനവും ആൽഫിയെ  പ്രേക്ഷകർക്കിടയിൽ പ്രിയങ്കരിയാക്കി മാറ്റി. നാടൻ മലയാളി പെൺകുട്ടിയുടെ നിഷ്ക്കളങ്കതയും മോഡേൺ പെൺകുട്ടികളുടെ പോസിറ്റീവ് ആറ്റിറ്റ്യൂഡും അനായാസം പ്രതിഫലിപ്പിക്കാൻ ആൽഫിക്ക് തന്റെ സിനിമകളിലൂടെ സാധിച്ചിട്ടുണ്ട്. 100 കോടി ക്ലബ്ബിൽ ഇടം പിടിച്ച ഉണ്ണിമുകുന്ദൻ ചിത്രം മാളികപ്പുറത്തിൽ സൗമ്യയായി വന്ന ആൽഫി മലയാളികളുടെ ശ്രദ്ധ വീണ്ടും പിടിച്ചുപറ്റുകയാണ്. ചിത്രത്തിന്റെ വിജയാഘോഷ വേളയിൽ ആൽഫി പ്രേക്ഷകരോട് പറഞ്ഞ കാര്യങ്ങളാണിത്.

അങ്കമാലിയിൽ നിന്ന് മാളികപ്പുറത്തേയ്ക്ക്...

നാലഞ്ചുവർഷമായി ഞാൻ സിനിമാ രംഗത്തുണ്ട്. മാളികപ്പുറത്തിന്റെ പ്രൊഡ്യൂസറും തിരക്കഥാകൃത്തും എന്റെ സുഹൃത്തുക്കളാണ്. ചിത്രത്തിൽ സൗമ്യ എന്നൊരു കഥാപാത്രത്തിന്റെ കാസ്റ്റിംഗ് ചെയ്യുന്ന സമയത്ത് ഞാൻ ഒരു സാരിയുടുത്തുനിൽക്കുന്ന ഒരു ഫോട്ടോ ഡയറകർ കാണുകയും സൗമ്യ എന്ന കഥാപാത്രത്തിന്റെ ക്യാരക്ടർ ലുക്ക് അവർക്ക് തോന്നുകയും ചെയ്തു. അങ്ങനെയാണ് മാളികപ്പുറത്തേയ്ക്ക് ഞാൻ എത്തിയത്.

സിനിമാജീവിതവും ജോലിയും എങ്ങനെ ഒരുമിച്ചുകൊണ്ടുപോകാൻ സാധിക്കുന്നു?