ചെണ്ടനാദം ഉറക്കുതാളമാക്കിയ മീരാകൃഷ്ണൻ

കണ്ടല്ലൂർ പാരമ്പര്യവഴിയിലെ അഞ്ചാം തലമുറക്കാരി

- പി. ജയചന്ദ്രൻ

കായംകുളം പുതുപ്പള്ളി കണ്ടല്ലൂർ കുടുംബത്തിന് ഒരു പാരമ്പര്യമുണ്ട്; മേളപാരമ്പര്യം. അസുരവാദ്യമായ ചെണ്ടയിൽ അത്ഭുതം തീർത്തവരാണ് കണ്ടല്ലൂർ കുടുംബത്തിലെ ഓരോ അംഗവും. കഥകളിയിലായാലും, തായമ്പകയിലായാലും, പഞ്ചാരി മേളത്തിലായാലുമൊക്കെ, ഏതിലും കാലാകാലങ്ങളിൽ ഒരു കുലപതിസ്ഥാനം ഈ കുടുംബത്തെ തേടിയെത്തിയിട്ടുണ്ട്. കണ്ടല്ലൂർ അനന്തൻ, മകൻ പപ്പു ആശാൻ, അദ്ദേഹത്തിന്റെ മകൻ കണ്ടല്ലൂർ സദാശിവൻ, സദാശിവന്റെ മകൻ ഡോ. കണ്ടല്ലൂർ ഉണ്ണികൃഷ്ണൻ, ഉണ്ണികൃഷ്ണന്റെ മക്കളായ ഹരി കൃഷ്ണൻ, മീരാകൃഷ്ണൻ എന്നിവരിലെത്തി നിൽക്കുന്ന ആ പാരമ്പര്യം അഞ്ച് തലമുറയുടെ ചരിത്രമാണ് പറയുന്നതെങ്കിലും അതിനും മുൻപ് ഒരു തലമുറ കൂടിയുണ്ടെന്നാണ് പറയപ്പെടുന്നത്. ആ തലമുറയുടെ മേള ഇടയ്ക്കക്കാരന്റെ കൂടുതൽ വിവരങ്ങളോ പേരോ ഒന്നും പക്ഷേ പിൻതലമുറയ്ക്ക് വലിയ പിടിത്തമില്ല.

അതെന്തായാലും ചെണ്ടയിൽ മേള പ്രപഞ്ചം സൃഷ്ടിക്കുന്ന കണ്ടല്ലൂർ കുടുംബത്തിന്റെ അനന്യമായ കഴിവ് കലാകേരളം മാത്രമല്ല, രാജ്യത്തിന് പുറത്തുവരെയുള്ള പതിനായിരക്കണക്കിന് ആസ്വാദകർ തലകുലുക്കി സമ്മതിച്ചിട്ടുണ്ട്. അതിന് തുടക്കം കുറിച്ചത് കണ്ടല്ലൂർ സദാശിവനിൽ നിന്നാണ്. സദാശിവന്റെ മുത്തച്ഛൻ അനന്തനും, അച്ഛൻ പപ്പു ആശാനും മേളത്തിൽ പേരെടുത്തവരും തെക്കൻ കേരളത്തിലെ പ്രധാന മേള പരിശീലകരുമായിരുന്നു. സദാശിവനാകട്ടെ ഉറക്കുപാട്ടിനേക്കാൾ പ്രിയം ചെണ്ടനാദത്തോടായിരുന്നു. കൊച്ചുമകന്റെ ചെണ്ടപ്രിയം കണ്ട് മുത്ത ച്ഛൻ അനന്തനാണ് സദാശിവന്റെ കയ്യിലേക്ക് ആദ്യമായി ചെണ്ടക്കോൽ എടുത്തു കൊടുത്തത്. തുടർന്ന് മുത്തച്ഛനും അച്ഛനും തങ്ങളുടെ അറിവുകൾ ഒന്നായി സദാശിവനിലേക്ക് സന്നിവേശിപ്പിച്ചപ്പോൾ ചെണ്ടവാദ്യത്തിലെ ഒന്നാം നിരയിലേക്കുയർന്ന സദാശിവൻ സഹോദരൻ സദാനന്ദനേയും കൂട്ടി കണ്ടല്ലൂർ സഹോദരർ എന്ന പേരിൽ പൂരപ്പറമ്പുകൾ കീഴടക്കി കലാമണ്ഡലത്തിൽ വരെ കൊട്ടിക്കയറി.