വീട്ടിൽ ഒരു തൊഴിൽ

നേട്ടങ്ങളും കോട്ടങ്ങളും

- p p

ജീവിതത്തിന്റെ എല്ലാ മേഖലകളിലുമുണ്ടായിട്ടുള്ള മാറ്റങ്ങൾ തൊഴിൽ മേഖലയിലും കാലാകാലങ്ങളിൽ ഉണ്ടായിട്ടുണ്ട്. മുൻകാലങ്ങളിൽ ജീവസന്ധാരണത്തിനുള്ള വഴിതേടി വീടിന് പുറത്തുപോകണമായിരുന്നു. ഇന്നും ബഹുഭൂരിപക്ഷം പേരുടേയും തൊഴിൽ മേഖലകൾ പുറത്താണ്.

വീടുകളിലിരുന്നും തൊഴിൽ ചെയ്യാനും വരുമാനമുണ്ടാക്കാനുമുള്ള സാധ്യതകൾ ഇപ്പോൾ സജീവമായി തീർന്നിരിക്കുന്നു. ഇത്തരം തൊഴിൽ സൗകര്യങ്ങൾ അഭ്യസ്തവിദ്യരായ സ്ത്രീകൾക്ക് വലിയ സഹായകമായി തീർന്നിരിക്കുകയാണ്. വീട്ടിലിരുന്ന് പലതരത്തിലുള്ള തൊഴിലുകൾ ചെയ്ത് ധനം സമ്പാദിക്കുന്ന നിരവധി വീട്ടമ്മമാരെ ഇന്ന് നമുക്ക് കാണാം. കമ്പ്യൂട്ടർ സംവിധാനം വികസിച്ചതോടെ ജോലിസാദ്ധ്യത വൻതോതിൽ വർദ്ധിച്ചിരിക്കുന്നു. ഗ്രാമപ്രദേശങ്ങളിൽപ്പോലും ഇങ്ങനെ ജോലി ചെയ്യുന്ന അമ്മമാർ ഇന്ന് ഏറെയാണ്. ഇവർക്കാകട്ടെ പുറത്തു പോയി പണിയെടുക്കുന്ന സ്ത്രീകളെക്കാൾ ജീവിത സാഹചര്യങ്ങളെ മെരുക്കിയെടുക്കാൻ കഴിയുന്നു. കൂടാതെ വീട്ടിലിരുന്ന് ജോലി ചെയ്യുന്ന അമ്മമാർക്ക് കുട്ടികളെ വേണ്ടവിധത്തിൽ ശ്രദ്ധിക്കാൻ കഴിയുന്നു. കുടുംബകാര്യങ്ങളിലും ഭർത്താവിന്റെയും മറ്റ് വീട്ടംഗങ്ങളുടേയും പ്രശ്നങ്ങളിൽ തക്ക സമയത്തിടപെട്ട് പരിഹാരം കാണാനും കഴിയുന്നു.