സിനിമാചരിത്രത്തിന്റെ പൊന്നാപുരം കോട്ട

അമൂല്യമായതിന് നശിക്കാനാവില്ല

- എസ്.പി.ജെ

കണ്ടും കേട്ടും വായിച്ചും പറഞ്ഞും മനസ്സിൽ കയറിക്കൂടിയ സിനിമാക്കാർക്കിടയിൽ ജയാ കാമത്ത് എന്ന വയോധികയുടെ മുഖമില്ല. സിനിമാചരിത്രത്തിന്റെ തിരുശേഷിപ്പുകൾക്ക് കാവലിരിക്കുന്ന എറണാകുളം സ്വദേശിനി ജയാ കാമത്തിന് കൊച്ചി നെട്ടേപ്പാടം റോഡിലുള്ള എച്ച്.ബി.കെ മെമ്മോറിയൽ 16 എം.എം ഫിലിം മ്യൂസിയം എന്നത് സ്വപ്നസാഫല്യം. സിനിമാചരിത്രമുറങ്ങുന്ന ഇങ്ങെത്തിയാൽ കാലം മായ്ക്കാത്ത സിനിമയുടെ വിസ്മയക്കാഴ്ചകൾ കാട്ടിത്തരുമിവർ. ഒപ്പം സിനിമയ്ക്കൊപ്പം സഞ്ചരിച്ച തന്റെ ജീവിതകഥയും...

അരനൂറ്റാണ്ട് പിന്നിലേയ്ക്ക് കാലം സഞ്ചരിക്കുന്നു. മൂന്നാറിലെ കുഞ്ഞിത്തണ്ണി ഗ്രാമത്തിലെ തേയിലത്തോട്ടങ്ങൾക്ക് നടുവിലൂടെയുള്ള ചെമ്മൺപാതയിലൂടെ ഉച്ചഭാഷിണി നെറുകയിൽ ഘടിപ്പിച്ച അനൗൺസ്മെന്റ് വാഹനം ഹനുമാൻ ഗിയറിൽ മുക്കിയും, മൂളിയും ആടിയുലഞ്ഞും നീങ്ങുന്നു. കമുകറ പുരുഷോത്തമന്റെ ശബ്ദത്തെ അനുസ്മരിപ്പിക്കും വിധം കോളാമ്പിയിലൂടെ തമിഴിൽ മുഴങ്ങുന്നത് ഇപ്പടി "ഇന്നേക്ക് സായന്ധം യാറ് മണിക്ക് ദേവികുളം അസാങ്ക് പള്ളിക്കൂടം പക്കത്തിലേ മലയാള തിരയ് പടം പാക്കലാം.. വറുവിൻ. വറുവിന്റെ തിരെ പടം കൺനിറയെ പാക്കലാം... പ്രേമനസീർ, ഷില ഒന്നിച്ച് നടിച്ച തിറിച്ചടി(തിരിച്ചടി). അടിയുടെ ഇടിയുടെ.. പൊട്ടിസ്സിറിയുടെ തിറിച്ചടി... അരയിൽ നിന്നും ഊർന്നുപോകാൻ തിടുക്കം കൂട്ടുന്ന നിക്കറിൽ ഒറ്റക്കയ്യിൽ പിടുത്തമിട്ട് ഓടിയടുക്കുന്ന വിരുതന്മാർക്ക് പിടികൊടുക്കാതെ അനൗൺസ്മെന്റ് വാഹനം ഗ്രാമവഴികളിലൂടെ പൊടിപറത്തി കുതിച്ചു.

സമയം സന്ധ്യയാകുന്നു. ദേവികുളം സർക്കാർ സ്ക്കൂൾ മുറ്റം പൂരപ്പറമ്പായി. 16 എം.എം ഫിലിം പ്രോജക്ടും, തിരശ്ശീലയും, ശബ്ദസംവിധാനവും ഒരുക്കുന്നവർക്ക് നിർദ്ദേശങ്ങൾ നൽകുകയാണ് എറണാകുളം സ്വദേശി ബാലകൃഷ്ണ കാമത്ത്. പ്രധാന സഹായിയായി അദ്ദേഹത്തിന്റെ ഭാര്യ ജയാ കാമത്തും ഒപ്പമുണ്ട്. കാത്തിരിപ്പിന് വിരാമമായി തിരശ്ശീലയിൽ ഹിറ്റ് പടത്തിന്റെ ടൈറ്റിൽ തെളിഞ്ഞതോടെ കയ്യടിയും ആർപ്പുവിളികളും വാനോളമുയർന്നു.

റിയൽ ലൈഫിന്റെ റീൽ ഓടിത്തുടങ്ങുന്നു...