ആസ്വദിക്കുക അമ്മമനസ്സ്

അമ്മയാകുന്നതോടെ ജീവിതത്തിലെ മറ്റൊരു സുന്ദരകാലം തുടങ്ങുകയാണ്. അതിനായി മനസ്സൊരുക്കാം

വിവാഹം കഴിഞ്ഞ ആദ്യ നാളുകളിലേ ജീവിതം ആസ്വദിക്കാനാകൂ എന്ന തെറ്റിധാരണ പല മനസ്സുകളിലും കയറിയിട്ടുണ്ടാകും. എന്നും ആസ്വദിക്കാവുന്ന ഒന്നാണു വിവാഹജീവിതം. അമ്മയായി കഴിയുമ്പോൾ ജീവിതത്തിന്റെ മറ്റൊരു സുന്ദരമായ അധ്യായം തുടങ്ങുകയാണ്.

എപ്പോൾ അമ്മയാകണം എന്ന തീരുമാനം പങ്കാളികൾ ഒന്നിച്ചെടുക്കേണ്ടതാണ്. ഏകപക്ഷീയമാകരുത്. കുഞ്ഞു ജീവിതത്തിലേക്കു വരുമ്പോൾ ശരീരം പോലെ തന്നെ മനസ്സിനെയും ഒരുക്കണം.

അതുവരെയുള്ള ജീവിതത്തിൽ നിന്നുള്ള മാറ്റമാണ് ഇനി. ഉത്തരവാദിത്തങ്ങൾ പങ്കുവയ്ക്കണം. ആദ്യ ഒൻപതു മാസം പല തരത്തിലുള്ള ആരോഗ്യ മാനസിക വ്യതിയാനങ്ങളിലൂടെ യാത്ര ചെയ്യേണ്ടി വരും. അമ്മയാകാൻ ഒരുങ്ങുന്നതു സ്ത്രീയാണെങ്കിലും തുല്യ പങ്കാളിത്തം തുടക്കം മുതൽക്കേ ഉണ്ടാകണമെന്നു പങ്കാളിയെ പറഞ്ഞു മനസ്സിലാക്കുക.

ഗർഭകാലത്തു മനസ്സിനെ സംഘർഷഭരിതമാക്കരുത്. പാട്ടുകൾ ആസ്വദിക്കുക, മനസ്സിനു സന്തോഷമുണ്ടാക്കു ന്ന കാര്യങ്ങൾ ചെയ്യുക. പങ്കാളിയുടെ പിന്തുണ ലഭിക്കാത്തപ്പോൾ കുറ്റപ്പെടുത്താത്ത രീതിയിൽ ആശങ്ക പങ്കുവയ്ക്കവുന്നതാണ്. ആ പിന്തുണ കിട്ടുമ്പോൾ ഉണ്ടാകുന്ന സന്തോഷം പ്രകടിപ്പിക്കുക.

ഗർഭിണിയാകുമ്പോൾ മുതൽ കുഞ്ഞു വളർന്നു വരുന്നതു വരെയുള്ള കാലത്തെ വൈകാരിക മാറ്റങ്ങൾ തിരിച്ചറിയണം. അതു നേരിടാൻ മനസ്സ് ഒരുക്കുക.

വിഷാദം പിടികൂടിക്കഴിഞ്ഞാൽ അതിനെ നേരിടാനുള്ള വഴികൾ തിരയണം. ആശങ്കകളിൽ നിന്നും സങ്കടങ്ങളിൽ നിന്നും മാറി നിൽക്കാൻ നമ്മളെത്തന്നെ എൻഗേജ്ഡ് ആക്കുക. ഹോബികൾ വായന എന്നിവയിലേക്കൊക്കെ മനസ്സിനെ മാറ്റുക.