கவித்திணைகளில் மிளிரும் பெருவனம்

வாழ்க்கை என்பது இரகசியங்கள் நிறைந்த பேழை. சில சமயம் அந்த ரகசியங்கள் பூப்போல மேலே மிதந்து வந்து இளைப்பாறலைத் தரும் வாய்ப்புகளை வாழ்க்கை ஏற்படுத்துகிறது.

- ப்ரியா பாஸ்கரன்

சில சமயம் இரகசியங்கள் மூர்க்கத்தனமாக உடைபடும் அபாயங்கள் நேர்கின்றன. சில சமயம் அவற்றைப் பேசியே ஆகவேண்டிய நிர்ப்பந்தத்தைச் சிலர் எதிர்கொள்ளும்போது நூலிழை பிரிவதுபோல் மெல்லமெல்ல அவை பிரியலாம். அல்லது சலனமற்ற குளத்தில் எறிந்த கல்லைப் போல் அலைகளை ஏற்படுத்தலாம். அபூர்வமாக அவை அடுத்தவரின் மனத்தை இளக்கி உறவின் ஒரு மூடப்பட்ட சன்னலைத் திறக்கலாம். அல்லது அதிலேயே செக்கு மாடு உழல்வது போல உழலலாம். உழன்று செய்வதறியா மனச்சிதைவையும் ஏற்படுத்தலாம். அன்றி கட்டவிழ்த்து சுதந்திரமாய் திரியலாம். எப்படி நமக்கு நாமே போட்டுக்கொண்ட விலங்கிலிருந்து வெளிவருவது..?