தார்மீக விதிகளுக்கு அப்பாற்பட்ட விதிகள்: மகாராஜா

2024-ல் வெளியாகியிருக்கும் மகாராஜா திரைப்படத்தின் இயக்குனர் நித்திலன் சுவாமிநாதன்.

- கவிதைக்காரன் இளங்கோ

இது அவருடைய இரண்டாவது திரைப்படம். முதல் திரைப்படம் குரங்கு பொம்மை 2017-ல் வெளியாகி பார்வையாளர்களின்

பரவலான கவனத்தை ஈர்த்தது. அதன் கதை சொல்லல் பாணியில் தன் படைப்பின் வித்தியாசத்தோடு அறிமுகமாகிய இயக்குனர், ஏழு வருடங்களுக்குப் பிறகு தற்சமயம் மகாராஜா திரைப்படத்தை படைத்திருக்கிறார். இதிலும் அவருடைய கதை சொல்லல் பாணி குறித்து நீக்கமற அனைத்து சினிமா பார்வையாளர்களிடையிலும் பேசுபொருளாகி உள்ளது.

திரைக்கதை அமைப்பதில் பல உத்திகள் உள்ளன. அதிலொன்று அ-நேர்க்கோட்டு முறை (Non Linear method). அவ்வுத்தி முறையினைக் கேட்பதற்கும் சொல்லிக்கொள்வதற்கும் எளிது போல தோன்றினாலும் அதற்கு அசாத்தியமான ஓர் உழைப்பு அவசியமாகிறது. சினிமா காட்சி ஊடகம் என்பதால் இதுபோன்ற திரைக்கதை உத்திகளுக்கு மூன்று மடங்கு கவனம் செலுத்தியாக வேண்டும். குறிப்பாக பார்வையாளர்களுக்கு அந்த உத்தி, தெளிவற்ற குழப்பத்தை ஏற்படுத்திவிட்டால் அப்படத்தைப் பார்க்கும் ஆர்வம், முதல் இருபதாவது நிமிடத்திற்குள்ளாகவே கதையம்சத்தோடு மனமொத்துப் போக முடியாதபடி ஒருவித தொந்தரவுக்குள்ளாகி விடும். இந்த அம்சம்தான் இயக்குனருக்கான முதன்மை சவாலாகும்.

நித்திலன் சுவாமிநாதன் தன்னுடைய இரண்டு படங்களிலும் இதே உத்தியில்தான் திரைக்கதையை அமைத்திருக்கிறார். அதே வகைமையின் சவாலை மகாராஜா படத்தின் வழியே தனக்குரிய உச்சபட்ச சாத்தியத்தை தொட்டுப் பார்த்திருக்கிறார். குழப்பம் ஏற்படுத்தாமலும் கதையம்சத்தில் தொய்வில்லாமலும் முதல் இருபது நிமிடங்களைக் கடந்துவிடுகிற நிலையில் அதன் இறுதி காட்சி வரையிலும் கொண்டுபோய் நிறுத்திக்கொள்ள முடிந்திருக்கிறது.

மகாராஜா என்பவன் சென்னையின் புறநகர் பகுதியில் ஒதுக்குப்புறமாய் உள்ள தனிவீட்டில் வசிப்பவன்.

அவனுடைய சொந்த வீடு. சென்னைக்குள் கே.கே.நகர் பகுதியில் சலூன் கடை வைத்திருக்கிறான். தினம் கடையை அடைத்த பிறகு பத்தரை மணிக்குள்ளாக டூ வீலரில் பயணித்து வீட்டுக்கு வந்துவிடுவான். இதுதான் அவனுடைய அன்றாடம். அவனுக்கு பதினைந்து வயதில் ஒரு மகள் இருக்கிறாள். பத்தாம் வகுப்பு படித்துக்கொண்டிருக்கிறாள்.