కొత్త నక్షత్రం

హర్యానా రాష్ట్రంలోని కర్నాల్ నగరంలో ఒక జంట తమ చిన్నారి పాపను చేతులు పట్టుకుని బాల నికేతన్ స్కూలు కార్యాలయానికి చేరుకున్నారు. వాళ్లు ఆమెను స్కూల్లో చేర్పించేందుకు వచ్చారు.

- కుసుమ్ అగర్వాల్

హర్యానా రాష్ట్రంలోని కర్నాల్ నగరంలో ఒక జంట తమ చిన్నారి పాపను చేతులు పట్టుకుని బాల నికేతన్ స్కూలు కార్యాలయానికి చేరుకున్నారు. వాళ్లు ఆమెను స్కూల్లో చేర్పించేందుకు వచ్చారు.

ఆఫీసులో ప్రిన్సిపాల్ వారిని పాప తండ్రి ఎవరని అడిగింది.

ఆ వ్యక్తి “మేడమ్, పాప తండ్రిని నేనే. నా పేరు బనారసీ లాల్ చావ్లా” అని చెప్పాడు. తర్వాత తన భార్యవైపు చూపిస్తూ “ఈమె సంజ్యోతి. పాప తల్లి” అని వివరించాడు.

తర్వాత ప్రిన్సిపాల్ అమ్మాయిని చూసి ప్రేమగా “పాపా నీ పేరు ఏమిటి?" అని అడిగింది.

“మోంటో” అని చెప్పింది పాప.

“అది మీ ఇంట్లో పెట్ నేమ్ అయి ఉండాలి.

స్కూలు రికార్డులలో మీరు ఏం పేరు పెట్టాలనుకుంటున్నారు?”.

పాప తల్లి జవాబు ఇచ్చింది. "మేడమ్, మేము మూడు నాలుగు పేర్లు అనుకున్నాం. కానీ దేనిపై నిర్ణయం తీసుకోలేదు" అని పేర్లన్నీ చెప్పింది.

పేర్లన్నీ విన్న తర్వాత మోంటో వెంటనే “కల్పన.నా పేరు కల్పన అని పెట్టండి. నాకది ఇష్టం" అని చెప్పింది.

"కానీ నీకు ఈ కల్పన పేరు ఎందుకు నచ్చింది?” నవ్వుతూ అడిగింది ప్రిన్సిపాల్.

“ఎందుకంటే కల్పన అంటే కలలు. నాకు కలలు కనడం ఇష్టం" మోంటో జవాబు ఇచ్చింది.

“కల్పన పుట్టిన తేదీ ఏమిటి?" ప్రిన్సిపాల్ అడిగింది మళ్లీ.

అప్పుడు భార్యాభర్తలు ఇద్దరు ఒకరి ముఖం ఇంకొకరు చూసుకున్నారు. భయపడుతూ వాళ్లు జులై ఒకటి 1961 అని చెప్పారు. ఆమె పుట్టిన తేదీ మార్చి 17, 1962 అని తెలిసినా వారు అలా చెప్పారు. ఆమె వయసు అనుమతించదగిన ప్రవేశ వయసు కంటే ఒక సంవత్సరం చిన్నది కాబట్టి సరైన తేదీ చెబితే కల్పనకి ఆ స్కూలులో ప్రవేశం దొరక్కపోవచ్చు అని వారు భావించారు.