ఆరోగ్యానికి నేస్తాలు - ఆకు కూరలు

ఆకుకూరలు అనునిత్యం ఆహారంతోపాటు తీసుకుంటే ఆరోగ్య పరంగా ఎన్నో ప్రయోజనాలు వుంటాయి.

ఆకుకూరలు అనునిత్యం ఆహారంతోపాటు తీసుకుంటే ఆరోగ్య పరంగా ఎన్నో ప్రయోజనాలు వుంటాయి. ఆకుకూరల్లో కొత్తిమీరను సువాసన ద్రవ్యంగా వాడతారు. ఇది దాదాపు 40 సెం.మీ. వరకు పెరిగే సుగంధ యుత ఏకవార్షికాక్షుపము. దీని ఫలాన్ని ధనియాలు అంటారు. భారతదేశం అంతా ఈ మొక్కలను సాగు చేస్తున్నారు.

కొత్తిమీర: కొత్తిమీరలో ప్రొటీన్లు, కాల్షియం, పాస్ఫరస్, ఐరన్, విటమిన్-సి, విటమిన్-ఎ లు వున్నాయి. దీని ఫలం నుండి సుగంధ తైలాలు తీస్తారు. కొత్తిమీర పచ్చడి చేసుకుని తింటే రుచిగా వుండి ఆకల్ని పుట్టిస్తుంది. కొత్తిమీర కంటికి మేలు చేస్తుంది. శరీరంలోని పైత్యాన్ని పోగొడుతుంది. వాంతులు, వికారాలను తగ్గిస్తుంది. కొత్తిమీర రసం, అల్లం కలిపి సేవిస్తే గొంతునొప్పి, శ్వాస సంబంధిత సమస్యలు, దగ్గు నయమవుతాయి.

పుదీనా:

సువాసనకే కాకుండా రుచికి, ఆరోగ్యానికి పుదీనా మంచిది. పుదీనాతో పచ్చళ్ళు, వెనిగార్, జెల్లీలు, చల్లని డ్రింక్స్ తయారుచేస్తారు. పుదీనా ఉత్తేజకారకం. కడుపులో వికారం కడుపు ఉబ్బరాలను తగ్గిస్తుంది. కడుపునొప్పికి విరుగుడుగా ఉపయోగపడుతుంది.

టూత్పేస్ట్, చూయింగ్ గమ్స్, పిప్పర్మెంట్, మెంథాల్తో పాటు అనేక మందుల్లో పుదీనాను వాడతారు. పుదీనా పచ్చడి తినడం వలన పైత్య వికారాలు, వాంతులు తగ్గుతాయి. నోటి దుర్వాసనను తగ్గిస్తుంది. గర్భిణీ స్త్రీలకు ఇది మంచి ఉపకారి. పుదీనా ఆకులను టీలో కలిపి తాగితే రుచిగా ఉండటమే గాక కంఠస్వరము బాగుంటుంది.

కరివేపాకు:

ఆహార పదార్థాల రుచి కోసం వంటకాల్లో కరివేపాకును ఉపయోగిస్తారు. కరివేపాకు సువాసనతోపాటు, వాతావరణ కాలుష్యాన్ని అదుపులో ఉంచుతుంది. కరివేపాకులో తేమ, ప్రొటీన్లు, కార్బోహైడ్రేట్లు, నార, మినరల్స్, కాల్షియం, ఫాస్పరస్, ఇనుము, కెరొటిన్, నికోటినిక్ ఆమ్లం, విటమిన్-సి మొదలయినవి లభిస్తాయి.