ஹீரோ வேலையை ஹீரோயினும்; ஹீரோயின் வேலையை ஹீரோவும் செய்வாங்க!

Mr.மனைவி ஷூட்டிங் ஸ்பாட் ரவுண்ட் அப்

- பேராச்சி கண்ணன்

பெயரில் மட்டுமல்ல, கதையிலும் அத்தனை வித்தியாசம் காட்டி ரசிகர்களைக் கவர்ந்திழுத்திருக்கும் புதிய தொடர்தான் சன் டிவியில் ஒளிபரப்பாகும் ‘Mr.மனைவி’.
ஏவிஎம் கார்டனில் ஹீரோ பவன் @ விக்கியின் பர்த்டே ஃபங்ஷன் காட்சிக்கான ஷூட்டிங் எனக் கேள்விப்பட்டு அதனுள் சங்கமித்தோம். முதலில் ஃபங்ஷனுக்கு ரெடியாகி வந்தார் நெகட்டிவ் ரோலில் ஸ்வேதா கேரக்டரில் கலக்கும் மான்சி.

‘‘சன் டிவியில் இதுதான் என் முதல் புரொஜெக்ட். இதுக்கு முன்னாடி ஒரு சீரியல் பண்ணினேன். அப்புறம், தெலுங்கு சீரியல்ல ஹீரோயினாக பண்ணியிருக்கேன். கன்னடத்துல ஐந்து புரொஜெக்ட்ஸ் பண்ணினேன். அங்க நெகட்டிவ் ரோல்ல நான் ஃபேமஸ்.  இந்தத் தொடர்ல நடிக்க விஷன் டைம்ல இருந்து ராஜேஷ் சார் பேசினாங்க. நெகட்டிவ் ரோல்னு சொன்னதும், ஆடியன்ஸ் எப்படி எடுப்பாங்களோனு ஒரு பயம் வந்தது. அப்ப ராஜேஷ் சார், ‘இந்தக் கேரக்டருக்கு ரொம்ப வெயிட்டேஜ் இருக்கு. நல்ல ரோல். சன் டிவியில் வர்றதால உங்க ரீச் இன்னும் உயரும்’னு நம்பிக்கை தந்தார்.

இப்ப இந்தக் கேரக்டருக்கு எவ்வளவு ரீச் இருக்குனு ஒருமுறை மாலுக்கு போனப்பதான் தெரிஞ்சுகிட்டேன். ஐ யெம் வெரி ஹேப்பி...’’ என்றார். அப்போது பர்த்டே காட்சியில் அனைவரையும் வரவேற்றபடி நடித்துக் கொண்டிருந்தனர் நடிகர் ராஜ்காந்தும், நடிகை அம்முவும். முதலில் பேசிய ராஜ்காந்த், ‘‘இதுக்கு முன்னாடி பண்ணினது எல்லாமே ஒரு ஸ்டைல் ஆஃப் ஆக்டிங்தான். இதுல நெகட்டிவ்வாக இருக்கும். ஒருசில இடத்துல ஹியூமராகவும் இருக்கும். அப்புறம், பாசிட்டிவ் மாதிரி தெரியும். இப்படி எல்லாமே கலந்தமாதிரி வருகிற ஒரு நல்ல கேரக்டர்.

முன்னாடியெல்லாம் புதுசா வர்றவங்களதான் ஆடிஷன் பண்ணி எடுப்பாங்க. இப்ப அப்படியில்ல. இந்தக் கேரக்டருக்கு ஆப்ட்டாக இருக்காரானு பார்க்க ஆடிஷன் பண்ணி எடுக்குற ஸ்டைல் வந்திடுச்சு. அப்படியாக, நான் கேரக்டருக்குப் பொருந்தி வந்ததால ‘மிஸ்டர் மனைவி’க்குள் வந்தேன்.