தமிழ் ஹீரோக்கள் தமிழ்ல கதை கேட்க தயங்கறாங்க!

‘‘தமிழ்நாட்டில் இருக்கும் ஹீரோக்களே தமிழில் கதை கேட்க தயங்கினால், யாரிடம் போய் கதை சொல்வது...’’ என ஆதங்கத்தோடு ஆரம்பித்தார் ‘நினைவெல்லாம் நீயடா’ படத்தின் இயக்குநர் ஆதிராஜன். இவர் ‘சிலந்தி’, ‘ரணதந்தீரா’ (கன்னடம்), ‘அருவா சண்ட’ படங்களை இயக்கியவர். இளையராஜாவின் 1417வது  படமாக வெளிவரவுள்ளது ‘நினைவெல்லாம் நீயடா’.

- எஸ்.ராஜா

போஸ்டர் டிசைன்ல ஹீரோ, ஹீரோயின் முகத்துல ரொமான்ஸ் வழியுதே?

யெஸ். போஸ்டரை பார்த்தாலே இது என்ன மாதிரியான படம்னு முடிவு செஞ்சுடலாம். ‘அழகி’, ‘ஆட்டோகிராப்’, ‘பள்ளிக்கூடம்’, ‘96’ மாதிரியான ஃபீல் குட் லவ் ஸ்டோரி இது.
உலகத்துல உள்ள பாதிப்பேருக்கு காதல் அறிந்தும் அறியாத வயசுலதான் வந்திருக்கு. பெரும்பாலும் அது பள்ளிக்கூட காதலாவும் இருக்கும். மறக்க முடியாத அந்த மாதிரியான காதல் அனுபவம் எல்லோருடைய நெஞ்சத்திலும் எங்கேயாவது ஒரு ஓரத்தில் இருக்கும்.

அது ஒருதலைக் காதலாகவும் இருக்கலாம்; இல்லைன்னா பரஸ்பர காதலாகவும் இருந்திருக்கலாம். அப்படி நம்முடைய வாழ்க்கையை கொஞ்சம் ரீவைண்ட் பண்ணிப்பார்த்தா ஒரு பெண் கிராஸ் பண்ணியிருப்பார்.திருமணமாகி செட்டிலான பலரிடம் இந்தக் கேள்வியைக் கேட்டுப்பாருங்க. உடனே அவங்க ஸ்கூல் டேஸுக்கு போய்டுவாங்க. அந்த வயசுல ஏற்பட்ட காதலை நெனைச்சுப் பார்ப்பாங்க. அதை ஞாபகப்படுத்துற மாதிரியான படம்தான் இது. படம் பார்க்கும் ரசிகர்களுக்கு அவர்களின் காதலியின் முகம் ஞாபகத்துல வரலாம். சிலர் காதலியை சந்திச்சா எப்படியிருக்கும் என்ற சிந்தனையை எழுப்பலாம்.

காதல் கதைக்குரிய டெம்ப்ளேட் லைன்தான் ஸ்டோரி. ஹீரோ, ஹீரோயின் இருவரும் மோதலில் ஆரம்பித்து காதலில் விழுகிறார்கள். ஹீரோ, ஹீரோயினிடம் தன் காதலைச் சொன்ன பிறகு ஹீரோயின் படிப்புக்காக வெளிநாடு செல்கிறார். காதலியின் பதிலுக்காகக் காத்திருக்கும் ஹீரோவின் காதல் வெற்றியடைந்ததா என்பதை முக்கோணக் காதல் கதையா சொல்லியுள்ளேன்.

ஹீரோவா பிரஜனை எப்படி தேர்வு செய்தீர்கள்?

லவ் ஸ்டோரி என்பதால் லவ்வபள் யங் ஹீரோ கிடைச்சா நல்லாயிருக்கும் என்ற மைண்ட்செட்லதான் கதை எழுதினேன். பல ஹீரோக்களிடம் கதை சொன்னேன். அவங்களுக்கு கதை பிடிச்சிருந்தாலும் ஓகே சொல்லத் தயங்கினாங்க.

பெயர் சொல்ல விரும்பவில்லை. சில ஹீரோக்கள் புது புரொடியூசர், அப்கமிங் டைரக்டர்னு ‘நோ’ சொல்லிட்டாங்க. வளர்ந்து வரும் சில ஹீரோக்கள் இங்கிலீஷ்ல ஸ்கிரிப்ட் கேட்டு தங்களுடைய மறுப்பை வேறுவிதமா தெரிவிச்சாங்க. இவ்வளவுக்கும் அவர்களுக்கு பிசினஸ் வேல்யூ சுத்தமா இல்ல.