இவன் நம்ம ஊரு.. அயலான்

‘‘டேய் அவன் அவங்க கிரகத்துக்கே கனெக்‌ஷன் கொடுத்திட்டான்டா... சேட்டை... சேட்டை... போ... போயி டீ போடு போ...’’ என முண்டா பனியன், டிரவுசருடன் வேற்றுக் கிரக வாசியையே டீ போடச் சொல்லும் எஸ்.கே & கோ சகிதமாக ‘அயலான்’ பட டீசர் அடடே சொல்ல வைத்து குறிப்பாக குழந்தைகளிடம் எதிர்பார்ப்புகளை எகிற வைத்திருக்கிறது.

- ஷாலினி நியூட்டன்

அறிவியல் படமானாலும் அதிலும் நம் மண்ணுக்கு நெருக்கமான காட்சிகள், காமெடி, உணர்வுகள் என கலந்து கதை சொல்லி இன்றைக்கும் மனதில் நிற்கிறது ஆர். ரவிகுமார் இயக்கிய ‘இன்று நேற்று நாளை’ படம். அவரின் இயக்கத்தில் அடுத்த படம்தான் ‘அயலான்’. ‘‘இடையில் சில படங்கள் இயக்கும் வாய்ப்புகள் வந்தாலும், ‘அயலான்’ வெளியான பிறகுதான் அடுத்த படம் என எனக்கு நானே கட்டுப்பாடுகள் விதிச்சிக்கிட்டேன். ‘அயலான்’ என்னதான் எனக்கு பிரேக் கொடுத்தாலும், இந்தப் படம் தான் என்னை அடுத்த கட்டத்திற்கு நகர்த்தப் போகிற படம்...’’ தன்னம்பிக்கையாகவும், பாசிட்டிவ் எண்ணங்களுடனும் பேசுகிறார் ரவிகுமார்.