ദൈവം കൈകൊട്ടനുഗ്രഹിച്ച വിജയം.... ഉണ്ണി മുകുന്ദൻ

പത്തുവർഷത്തിനിടെ കരിയറിൽ നേരിട്ട ഒറ്റപ്പെടലുകൾ, വിവാദങ്ങൾ, സംഘർഷങ്ങൾ ഇതെല്ലാം തരണം ചെയ്തുകൊണ്ട് ഉണ്ണി മുകുന്ദൻ എന്ന നടൻ വലിയൊരു തിരിച്ചുവരവ് നടത്തിയിരിക്കുകയാണ്. യഥാർത്ഥത്തിൽ അടിച്ചുവീഴ്ത്തപ്പെട്ട നായകൻ ഉയർത്തെഴുന്നേറ്റ മാസ് എൻട്രിയാണ് ഉണ്ണി മുകുന്ദൻ മലയാളസിനിമയ്ക്കായി നൽകിയിരിക്കുന്നത്. ഇതിലും വലിയൊരു തിരിച്ചുവരവ് സ്വപ്നങ്ങളിൽ മാത്രമെന്നാണ് ആരാധകർ വിശേഷിപ്പിക്കുന്നത്.

- അപ്പൂസ്. കെ. എസ്

അഹമ്മദാബാദിൽ നിന്ന് തൃശൂരിലേക്ക് ട്രെയിൻ കയറുമ്പോൾ ആ ചെറുപ്പക്കാരന്റെ ഉള്ളിൽ ഒരു ലക്ഷ്യമുണ്ടായിരുന്നു, ശബരിമലയിലേക്കുള്ള യാത്ര പോലെ തന്റെ വഴികളിൽ കല്ലും മുള്ളുമുണ്ടാകും. സ്വപ്നസന്നിധിയിലേക്കുള്ള യാത്ര അതികഠിനമാണെങ്കിലും ആപത്തുണ്ടാവുമ്പോൾ അയ്യപ്പൻ കാത്തോളുമെന്ന് മനസ്സിൽ ഉരുവിട്ടു. കഠിനപരീക്ഷണങ്ങൾക്കൊടുവിൽ ആ ചെറുപ്പക്കാരൻ വിജയസന്നിധിയിൽ എത്തിനിൽക്കുന്നു. അയ്യന്മാരുടെ ശരണം വിളികൾ പോലെ ആരാധകർ ഒന്നടങ്കം ഉണ്ണി മുകുന്ദന്റെ തിരിച്ചുവരവിനെ വാഴ്ത്തിപ്പാടുകയാണ്. ഒരു തുടക്കക്കാരനും ഇതുവരെ മലയാളികൾ കൊടുക്കാത്ത അത്രയും പിന്തുണകളും കയ്യടികളും ആരാധനയും ചുരുങ്ങിയ സമയം കൊണ്ട് നേടിയെടുത്ത നടൻ. ആരാധകരുടെ മസിലളിയൻ 'ഉണ്ണി മുകുന്ദൻ'. ഉണ്ണി മുകുന്ദനിലെ നടനെ വിശേഷിപ്പിക്കാൻ ഇനിയുമേറെയുണ്ട്. ഒരു കൊമേഴ്ഷ്യൽ സിനിമയ്ക്ക് വേണ്ട എല്ലാ ചേരുവകളും സിനിമാജീവിതത്തിൽ ഉൾക്കൊണ്ട് മലയാളസിനിമയിലേക്ക് ഉണ്ണി മുകുന്ദൻ വീണ്ടുമൊരു തിരിച്ചുവരവ് നടത്തിയത് അപ്രതീക്ഷിതമായാണ്. ഒരു ഗോഡ്ഫാദറും ഇല്ലാതെ മലയാള സിനിമയുടെ നെറുകയിൽ ഇത്രയും കാലം പിടിച്ചുനിൽക്കുക എന്നത് ഒരു തുടക്കക്കാരനെ സംബന്ധിച്ച് ചെറിയൊരു കാര്യമായിരുന്നില്ല. കഴിഞ്ഞ പത്ത് വർഷങ്ങൾക്കിടയിൽ ബോക്സ് ഓഫീസിൽ ഒരിളക്കവും തട്ടാതെ ഉണ്ണിമുകുന്ദൻ ചിത്രങ്ങൾ കടന്നുപോയിട്ടുണ്ട്. പക്ഷേ പിന്തുണ നൽകിക്കൊണ്ടിരിക്കുന്ന മുകുന്ദൻ എന്ന നടനിൽ അത്രയും പ്രതീക്ഷയുണ്ടായിരുന്നു. ഇത്രയധികം കാലം മലയാളികൾ അദ്ദേഹത്തെ നെഞ്ചോട് ചേർത്തുവച്ചതും മാളികപ്പുറം എന്ന ചിത്രത്തിന്റെ ഹിറ്റിനു വേണ്ടിയാണെന്ന് തോന്നിപ്പോകും.