പണി പാളുന്ന സിനിമാക്കാർ!

തന്റെ ചിത്രങ്ങളെ താറടിച്ച് കാണിക്കാൻ അല്ലെങ്കിൽ റിവ്യൂ ബോംബിംഗ് നടത്തി ഇല്ലാണ്ടാക്കാൻ ആരേലും ശ്രമിച്ചാൽ അതിനെതിരെ പ്രതികരിക്കാനും പ്രതിഷേധിക്കാനുമുള്ള അവകാശം നടൻ ജോജു ജോർജ്ജിനുണ്ട്. ജോജുവിനെപ്പോലെ അത്തരം പ്രതിഷേധങ്ങൾക്കുള്ള അവസരം എല്ലാ താരങ്ങൾക്കുമുണ്ട്. പക്ഷേ, വിമർശനങ്ങൾ വിവാദങ്ങൾക്ക് വഴി മരുന്നിടുന്ന സാഹചര്യം ഉണ്ടാവുകയാണെങ്കിൽ, വിമർശനം ഭീഷണിക്ക് വഴി മാറിയിട്ടുണ്ടോ അല്ലെങ്കിൽ വാക്കുകൾ യുക്തി ഭദ്രമായിരുന്നോ എന്നതും കൂടി പരിശോധിക്കുന്നത് ഉചിതമായിരിക്കും. 'പണി എന്ന തന്റെ ആദ്യ സംവിധാന സംരംഭത്തെക്കുറിച്ച് മോശം അഭിപ്രായം രേഖപ്പെടുത്തിയ ഗവേഷകവിദ്യാർത്ഥിയെ നടൻ ജോജു ജോർജ്ജ് ഫോണിൽ വിളിച്ച് സംസാരിച്ചത് വിവാദമായതിന്റെ പശ്ചാത്തലത്തിലാണ് ഈ കുറിപ്പ് എഴുതുന്നത്.

- അനീഷ് മോഹനചന്ദ്രൻ

ഇവിടെ കാര്യങ്ങളെ ഒരു തേർഡ് പാർട്ടി വ്യൂവിലൂടെ വിലയിരുത്താം. ജോജു വിന്റെ(സംവിധാനം, അഭിനയം, നിർമ്മാണപങ്കാളിത്തം) ചിത്രം മോശമാണെന്നും അതിൽ അദ്ദേഹത്തിന്റെ പ്രകടനം നിരാശപ്പെടുത്തിയെന്നും ഒരാൾ ഫേസ്ബുക്കിൽ എഴുതുന്നു. പ്രസ്തുത കണ്ടെന്റ് ഇൻസ്റ്റഗ്രാമിലും ഓട്ടോമാറ്റിക്കായി പ്രത്യക്ഷപ്പെടുന്നു. സിനിമാക്കൂട്ടായ്മകളുടെ ഫേസ്ബുക്ക് ഗ്രൂപ്പുകളിൽ ചിലതിലും അയാൾ അത് ഷെയർ ചെയ്യുന്നു. ഇത്തരം ഗ്രൂപ്പുകളിൽ അഡ്മിന്റെ അനുമതി ഉണ്ടെങ്കിൽ മാത്രമേ ഓരോ കണ്ടെന്റും പ്രസിദ്ധീകരിക്കപ്പെടുകയുള്ളൂ. സിനിമയെക്കുറിച്ച് ക്രിയാത്മകമായ ചർച്ചകൾ നടക്കുന്ന അത്തരം പ്ലാറ്റ്ഫോമുകൾ പ്രേക്ഷകരിൽ ചിലരെയെങ്കിലും സ്വാധീനിക്കും എന്നത് നിസ്തർക്കമായ കാര്യമാണ്. കാരണം ലോകസിനിമയുമായി എക്സ്പോസ് ചെയ്യപ്പെട്ട ഒരു കമ്മ്യൂണിറ്റിയാകും ഇത്തരം ഗ്രൂപ്പുകളിലെ സജീവഅംഗങ്ങൾ. അതുകൊണ്ടുതന്നെ ക്രിയാത്മകമായ വിമർശനങ്ങളും വിലയിരുത്തലുകളും ഇത്തരം വേദികളിൽ ഹോട്ട് കേക്കായി മാറാറുണ്ട്. ഇത് ജോജുവിന്റെ ചിത്രത്തിന്റെ മാത്രം കാര്യമല്ല കേട്ടോ.

അത്തരത്തിൽ നമ്മുടെ ഗവേഷക വിദ്യാർത്ഥി പോസ്റ്റ് ചെയ്ത സംഗതി ശ്രദ്ധിക്കപ്പെടുകയും സജീവ ചർച്ചയാവുകയും ചെയ്തു. ഇത് പലരും പല തലത്തിലാകും സ്വീകരിച്ചിട്ടുണ്ടാവുക. മോശം സിനിമകളെ തിരഞ്ഞു പിടിച്ചു വിമർശിക്കുന്നവരും, ജോജുജോർജ്ജ് എന്ന നടനോട് വ്യക്തിവിരോധമുള്ളവരും ജോജു എന്ന നടനെ ഇഷ്ടമില്ലാത്തവരുമൊക്കെ പ്രസ്തുത പോസ്റ്റ് ലൈക്ക് ചെയ്യുകയോ ഷെയർ ചെയ്യുകയോ അഭിപ്രായം രേഖപ്പെടുത്തുകയോ ചെയ്തിട്ടുണ്ടാകാം. ഇത് ശ്രദ്ധയിൽപ്പെട്ട ജോജുവിന് മാനസികപ്രയാസം ഉണ്ടായിട്ടുണ്ടെങ്കിൽ അതിൽ അദ്ദേഹത്തെ തെറ്റ് പറയാൻ സാധിക്കില്ല. കാരണം, ഒരു സിനിമാക്കാരനും ഒരു മോശം സംഗതി സൃഷ്ടിക്കണം എന്ന ഉദ്ദേശ്യത്തോടെ ആകില്ലല്ലോ ഒന്നിന് പിന്നാലെ ഇറങ്ങിത്തിരിക്കുക. വർഷങ്ങൾ നീണ്ട അധ്വാനവും കാത്തിരിപ്പും പ്രതീക്ഷയും അതിനെല്ലാമുപരി സാമ്പത്തികഭാരവും അണിയറക്കാർക്കുമേൽ തീർക്കുന്ന സമ്മർദ്ദത്തെ നിസ്സാരമായി കാണാൻ സാധിക്കില്ല. ഇവിടെ ജോജുവിന്റെ കാര്യവും അങ്ങനെ തന്നെയായിരുന്നു.