ഭക്ഷണം ഇങ്ങനെ കഴിച്ചുനോക്കൂ...

ആഹാരങ്ങൾ നിർദേശിച്ചും നിഷേധിച്ചുമാണ് ആയുർവേദം രോഗങ്ങളെ വരുതിയിലാക്കുന്നത്. സ്വസ്ഥന്റെയും ആതുരന്റെയും ചികിത്സയിൽ ഔഷധത്തോളം പ്രധാനമാണ് ആഹാരവും

- ഡോ.പ്രിയ ദേവദത്ത് കോട്ടയ്ക്കൽആര്യവൈദ്യശാല മാന്നാർ, ആലപ്പുഴ [e-mail]

പുരാതനകാലം മുതലേ അതുല്യമായൊരു പാചകപാരമ്പര്യമാണ് കേരളത്തിനുള്ളത്. ഇനത്തിലും ഗുണത്തിലും നിറത്തിലും വൈവിധ്യം പുലർത്തിയിരുന്ന അക്കാലത്തെ ഓരോ വിഭവങ്ങളും ഏറെ സ്വാദിഷ്ടവും സമീകൃതവുമായിരുന്നു. എന്നാൽ ഒട്ടും പോഷകസമ്പന്നമല്ലാത്ത പാഴ് ഭക്ഷണങ്ങൾ നിത്യജീവിതത്തിൽ ഇടംനേടിയതോടെ ചിരപരിചിതവും പരമ്പരാഗതവുമായ ആഹാരശീലങ്ങളിൽനിന്ന് പലരും അകന്നുപോയി.

രോഗപ്രതിരോധത്തിന് ശരിയായ ഭക്ഷണശീലങ്ങൾക്കും വലിയൊരു പങ്കുണ്ട്. പരമ്പരാഗത സമ്പ്രദായങ്ങൾ തന്നെയാണ് പോഷകസമ്പന്നമായ ഭക്ഷണമൊരുക്കാൻ എന്നും നമുക്ക് വഴികാട്ടികൾ. മത്തങ്ങ, കുമ്പളങ്ങ, വെള്ളരി ഇവ കെട്ടിത്തൂക്കിയും, പയറും പാവയ്ക്കയും, പച്ചമുളകും കൊണ്ടാട്ടമുണ്ടാക്കിയും പിൽക്കാലത്തേക്കവർ സൂക്ഷിച്ചിരുന്നു. മാങ്ങയും നാരങ്ങയും നെല്ലിക്കയും ഉണക്കിയോ അച്ചാറിട്ടോ ആണ് സൂക്ഷിക്കുക.

രോഗാവസ്ഥയിൽ ആഹാരത്തിന് പ്രാധാന്യമുണ്ടോ?

ആഹാരങ്ങൾ നിർദേശിച്ചും നിഷേധിച്ചും ആയുർവേദം രോഗങ്ങളെ വരുതിയിലാക്കുന്ന സ്വസ്ഥന്റെയും ആതുരന്റെയും ചികിത്സയിൽ ഔഷധത്തോളം പ്രധാനമാണ് ആഹാരവും. പല രോഗാവസ്ഥകളിലും ഔഷധങ്ങൾക്കൊപ്പം ശീലമാക്കേണ്ട ഭക്ഷണങ്ങളും വ്യത്യസ്തമാണ്. എന്നാൽ രോഗികൾക്ക് പോഷകാഹാരക്കുറവ് വരാതെ ശ്രദ്ധിക്കുകയും വേണം. ഉദാഹരണത്തിന് ദഹനപ്രശ്നങ്ങളിൽ ഔഷധങ്ങൾക്കൊപ്പം കഞ്ഞി, പപ്പടം ചുട്ടത്, ഉപ്പിലിട്ട ചെറുനാരങ്ങ, കണ്ണിമാങ്ങ, കൂവപ്പൊടി കുറുക്കിയത്, മലർക്കഞ്ഞി, മാതളനാരങ്ങയുടെ നീര്, എന്നിവയൊക്കെ രോഗിയുടെ വിശപ്പിനും ദഹനത്തിനും അനുസരിച്ച് മാറിമാറി നൽകാം. അസുഖം മാറുന്ന മുറയ്ക്ക് ഈ ഭക്ഷണശൈലി മാറ്റുകയും വേണം.

പ്രോട്ടീനിന്റെ അഭാവം നികത്തേണ്ട സന്ദർഭങ്ങളിൽ കുടംപുളി ചേർത്ത മീൻകറിയോ നാടൻ കോഴിസൂപ്പോ ദഹനത്തിനും രുചിക്കും അനുസരിച്ച് ഉൾപ്പെടുത്താറുണ്ട്. സസ്യാഹാരികൾക്കാകട്ടെ പച്ചക്കറി സൂപ്പ്, പരിപ്പ് രസം, പാൽ, പാൽക്കഞ്ഞി ഇവ ഉൾപ്പെടുത്താം. ഡീജനറേറ്റിവ് ആർത്രൈറ്റിസിൽ  ഔഷധത്തോടൊപ്പം ആട്ടിൻസൂപ്പ്  ഉപയോഗിക്കാറുണ്ട്.

ഭക്ഷണം രോഗങ്ങൾക്ക് ഇടയാക്കുന്നതെങ്ങനെ?